![](https://albanianpost.com/wp-content/uploads/2024/06/714525.png)
Presidenti francez Emmanuel Macron ka thënë se shkollat në Francë janë duke u kërcënuar nga “plaga e antisemitizmit”.
Reagimi i tij vjen pasi një vajzë 12-vjeçare hebreje u përdhunua. Një krim ky, i cilësuar nga policia një krim urrejtjeje.
Sipas mediave franceze, vajza i tha policisë se kishte qenë në një park në Courbevoie, në veriperëndim të Parisit, me një mik të shtunën e kaluar kur tre djem – dy 13 vjeç dhe një 12 vjeç – iu afruan asaj.
Ajo njihte vetëm njërin prej tyre.
Viktima tha se djemtë e tërhoqën zvarrë në një vend të izoluar përpara se të abuzonin me të.
Djemtë u arrestuan të hënën dhe dy prej tyre u akuzuan për përdhunim në grup, fyerje dhe dhunë antisemitike, si dhe kërcënime me vdekje.
Mediat franceze raportuan gjithashtu se njëri nga sulmuesit e ka kërcënuar se do ta vriste vajzën nëse ajo shkonte në polici.
Në përgjigje të sulmit, njerëzit dolën në rrugë për të protestuar kundër antisemitizmit, duke mbajtur pankarta duke përfshirë një që shkruhej: “Mund të ishte motra juaj”.
Macron foli për sulmin në Courbevoie gjatë një takimi të Këshillit të Ministrave, ku ai takohet me anëtarët e qeverisë së tij.
Ai i kërkoi ministres së Arsimit, Nicole Belloubet, të sigurojë që gjatë ditëve të ardhshme shkollat të zhvillojnë një dialog mbi temat e racizmit dhe urrejtjes ndaj hebrenjve për të parandaluar “gjuhën e urrejtjes me pasoja të rënda” në klasa.
Kryeministri Gabriel Attal sakaq e quajti sulmin “absolutisht të neveritshëm, të padurueshëm dhe të papërshkrueshëm”.
“Fatkeqësisht, që nga 7 tetori, antisemitizmi ka ardhur sërish në rritje në vendin tonë”, tha ai.
Një raport i janarit 2024 nga Këshilli i Institucioneve Hebraike në Francë (CRIF) tha se kishte pasur një rritje prej 284% të akteve antisemitike në Francë midis viteve 2022 dhe 2023.
Gjithashtu gati se 13% e akteve të tilla vitin e kaluar kanë ndodhur në shkolla.
Një rritje e konsiderueshme u raportua në vazhdën e sulmeve të Hamasit të 7 tetorit kundër komuniteteve në Izrael.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com