LVV dorëzon kallëzim penal ndaj kryetarit të Prizrenit

Lëvizja Vetëvendosje Qendra në Prizren, ka bërë të ditur se të hënën kanë dorëzuar kallëzim penal pranë Prokurorisë Themelore në Prizren ndaj Shaqir Totaj.

Lajmin është bërë i ditur përmes një shkrimi në rrjetin social ‘Facebook’ nga kjo parti.

“Qendra në Prizren ka dorëzuar Kallëzim Penal pranë Prokurorisë Themelore në Prizren ndaj Shaqir Totajt dhe vartësve të tij në Komunën e Prizrenit të cilët kanë degraduar arsimin në Komunën e Prizrenit përmes zgjedhjes së drejtorëve partiak dhe në kundërshtim me ligjet në fuqi”, është thënë në njoftimin e LVV-së.

Sipas tyre, procesi i zgjedhjes së drejtorëve në institucionet edukativo-arsimore publike në Komunën e Prizrenit është përcjellur me parregullsi të shumta të cilat e kanë dëmtuar integritetin dhe kredibilitetin e sistemit arsimor.

“Vetëvendosje në Prizren, duke iu përgjigjur shqetësimeve të qytetarëve, prindërve dhe shoqërisë civile për proces jo transparent e të kundërligjshëm, përmes këtij kallëzimi penal kërkon që organet kompetente të shtetit të ndërmarrin masat e duhura penale-juridike për të zbardhur të vërtetën me rastin e zgjedhjes së drejtorëve në shkollat e Prizrenit”.

Ndërkaq, qeverisjen në Prizren e kanë quajtur degradim të qytetit në shumë aspekte.

“Lidhur me këtë iu drejtohemi qytetarëve, atyre që iu mohohen të drejtat ligjore për shkak të veprimeve klienteliste dhe nepotiste të këtij pushteti, shoqërisë civile dhe akterëve të ndryshëm shoqëror që të veprojmë bashkërisht për të ndalur këtë degradim dhe për të detyruar organet komunale të veprojnë në bazë të ligjit dhe konform interesit publik gjatë ushtrimit të kompetencave të tyre”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.