Kryeministri izraelit, Benjamin Netanyahu, ka thënë se “faza intensive” e luftimeve në Rafah në Gazën jugore pothuajse ka përfunduar, por kjo nuk do të thotë se luftës po i vjen fundi.

Ai tha se lufta do të vazhdojë, derisa Hamasi të largohet plotësisht nga pushteti.

Ai shtoi se Ushtria izraelite së shpejti do të jetë në gjendje të ridislokojë trupa në kufirin me Libanin, ku shkëmbimet e zjarrit me Hezbollahun janë përshkallëzuar.

Netanyahu gjithashtu hodhi poshtë idenë që Autoriteti Palestinez me bazë në Bregun Perëndimor duhet të drejtojë Gazën në vend të Hamasit.

“Në fund, do t’ju duhet të bëni dy gjëra: do t’ju duhet çmilitarizimi i vazhdueshëm ushtarak nga Forcat Mbrojtëse të Izraelit dhe do t’ju duhet të krijoni një administratë civile, shpresoj që me mbështetjen dhe menaxhimin e vendeve të caktuara në rajon, Mendoj se kjo është mënyra e duhur për të ecur përpara”, tha ai në një intervistë televizive izraelite.

“Unë do t’ju them atë që nuk jam gati të bëj, nuk jam gati të krijoj një shtet palestinez atje, nuk jam gati t’ia dorëzoj Autoritetit Palestinez. Unë nuk jam gati ta bëj këtë”.

Banorët e Rafahut thanë se kishte pasur më shumë përleshje në qytet, ndërsa sulmet ajrore izraelite në qytetin e Gazës raportohet të kenë vrarë drejtorin e shërbimeve të urgjencës të Ministrisë së Shëndetësisë të drejtuar nga Hamasi.

Një qendër e shpërndarjes së ndihmave u godit gjithashtu: IDF tha se po përdorej nga Hamasi.

Ministri izraelit i Mbrojtjes, Yoav Gallant, ka nisur një vizitë në Washington, për të diskutuar luftën në Gaza dhe tensionet në rritje me Hezbollahun, i cili mbështetet nga Irani.

Ushtria izraelite nisi një fushatë për të shkatërruar Hamasin, në përgjigje të sulmit të paprecedentë të grupit të armatosur palestinez në Izraelin jugor më 7 tetor, gjatë të cilit rreth 1 mijë e 200 njerëz – kryesisht civilë – u vranë dhe 251 të tjerë u morën peng.

Më shumë se 37 mijë e 551 njerëz janë vrarë në Gaza që atëherë, sipas ministrisë së shëndetësisë të territorit të Hamasit. Shifrat e saj nuk bëjnë dallime midis civilëve dhe luftëtarëve, por thuhet se kishte identifikuar 14 mijë e 680 fëmijë, gra dhe të moshuar mes të vdekurve deri në fund të prillit.