Limaj: LVV-ja të lëshojë rrugë

Deputeti dhe kryetari i Nismës Socialdemokrate, Fatmir Limaj, ka kërkuar që Lëvizja Vetëvendosje – si fituese e zgjedhjeve – t’ua hapë rrugën partive të tjera parlamentare për formimin e institucioneve të reja.

“Besoj se tashmë është bërë e qartë se partia që i ka fituar zgjedhjet nuk i ka votat dhe është koha të lëshojë rrugë për të krijuar një shumicë e cila do t’i themelonte institucionet”, tha Limaj për gazetarë pas dështimit të serishëm të konstituimit të Kuvendit.

Ai pohoi se partia e tij nuk ka marrëveshje politike me asnjë parti.

Murati: LVV-ja në këtë fazë s’është për opsionin e zgjedhjeve të jashtëzakonshme

Ish-ministri i Financave, Hekuran Murati, pas dështimit të serishëm të konstituimit të Kuvendit të Kosovës, tha se Lëvizja Vetëvendosje nuk po mendon për opsionin e zgjedhjeve të jashtëzakonshme në këtë fazë.

Sipas tij LVV-ja është për konstituimin sa më të shpejtë të Kuvendit të Kosovës.

“Nëse Kuvendi në vazhdimësi refuzon të konstituohet, kjo situatë nuk është paraparë në Kushtetutë, pra nëse kemi një situatë të tillë atëherë mendoj se opsioni i fundit janë zgjedhjet, por ne nuk mendojmë që jemi aty, ne nuk duam të shkojmë në atë skenarë, ne jemi të interesuar që sa më parë të zhbllokohet Kuvendi”, tha ai.

Opsioni i zgjedhjeve, sipas Muratit, mund të hyjë në lojë vetëm atëherë kur Lëvizja Vetëvendosje dështon ta formojë qeverinë në përputhje me afatet ligjore.

“Nëse dështojmë në formimin e qeverisë, mund të ketë zgjedhje të reja”, shtoi ai.

Krasniqi: Zgjidhja do të ishte të mbahen zgjedhje të jashtëzakonshme në maj

Kryetari i Partisë Demokratike të Kosovës, Memli Krasniqi, ka akuzuar Lëvizjen Vetëvendosje se qëllimisht nuk po dëshiron ta zhbllokojë konstituimin e Kuvendit të Kosovës pasi që nuk po ndryshon propozimin për postin e kryeparlamentarit.

Ai tha se nëse Kuvendi nuk konstituohet, zgjidhja do të ishte të mbahen zgjedhje të jashtëzakonshme në maj të këtij viti.

“Një gjë është e qartë, Albulena Haxhiu nuk kalon. Sikur të donin zgjidhje, kanë pasur mundësi edhe sot, edhe pardje, edhe para katër ditësh. të njëjtën mundësi e kanë edhe pasnesër: Ta ndërrojnë deputetin”, tha Krasniqi.

Ai tha se kjo po bëhet pasi LVV-ja nuk i ka votat e mjaftueshme për ta formuar qeverinë e re.

“Kjo vërtetë tashmë është komplet e pakuptimtë, e turpshme, që për teket e një personi, një kandidati, të mbahet peng shteti”, tha Krasniqi.

Kuvendi i Kosovës sërish pa kryetar

Të premten për të katërtën herë me radhë kandidatja e Lëvizjes Vetëvendosje për kryetare të Kuvendit të Kosovës, Albulena Haxhiun, nuk ka arritur t’i marrë votat e nevojshme për t’u bërë kryekuvendare.

Haxhiun për kryeparlamentare votuan vetëm 57 ligjvënës nga 117 të pranishëm. 46 ishin kundër saj, ndërsa tre deputetë abstenuan. Për t’u bërë kryekuvendare Haxhiut i nevojiten të paktën 61 vota.

Paraprakisht deputeti i Lëvizjes Vetëvendosje, Glauk Konjufca, propozoi sërish Albulena Haxhiun për postin e kryeparlamentares së Kuvendit të Kosovës.

Ai u kërkoi votën edhe partive të tjera, duke u thirrur në tentim për të zhbllokuar konstituimin e Kuvendit të Kosovës.