Në Lituani, Ministria e Mbrojtjes ka rekomanduar që konsumatorët të shmangin blerjen e celularëve kinezë dhe i ka këshilluar njerëzit që t’i hedhin ata që disponojnë aktualisht.
Kjo pasi një raport i qeverisë ka zbuluar se pajisjet kishin aftësi të integruara të censurës.
Agjencia e lajmeve, “The Guardian”, tregon se telefonat kryesorë të shitur në Evropë nga Xiaomi Corp kanë një aftësi të integruar për të zbuluar dhe censuruar terma të tillë si “rroftë pavarësia e Tajvanit” ose “lëvizja e demokracisë”, ka thënë organi shtetëror i sigurisë në internet.
Për rajonin e Bashkimit Evropian, aftësia në software-in e telefonit Mi 10T 5G të Xiaomi-t ishte çaktivizuar, por mund të ndizet nga distanca në çdo kohë, ka treguar qendra kombëtare e sigurisë kibernetike e ministrisë në raport.
“Rekomandimi ynë është që të mos blini telefona të rinj kinezë dhe të hiqni qafe ato që janë blerë sa më shpejt që të jetë e mundur”, ka thënë zëvendësministri i mbrojtjes, Margiris Abukevicius.
“The Guardian” tregon se kohët e fundit, marrëdhëniet midis Lituanisë dhe Kinës janë acaruar.
Muajin e kaluar, Kina ka kërkuar që Lituania të tërhiqte ambasadorin e saj në Pekin dhe ka thënë se do të tërhiqte të dërguarin e saj në Vilnius, pasi Tajvani njoftoi se misioni i vet në Lituani do të quhej Zyra Përfaqësuese e Tajvanit.
Në Evropë dhe SHBA, misionet tajvaneze përdorin emrin e qytetit Taipei, duke shmangur një referencë për vetë ishullin, të cilin Kina e pretendon si territor të vetin.
Jake Sullivan, këshilltari i sigurisë kombëtare të presidentit amerikan, Joe Biden, ka folur me kryeministren e Lituanisë, Ingrida onimonytė, javën e kaluar dhe ka theksuar mbështetjen për vendin përballë presionit nga Kina.
Nga ana tjetër, raporti i qendrës kibernetike kombëtare ka nxjerrë se telefoni Xiaomi po dërgonte të dhëna të koduara të përdorimit të telefonit në një server në Singapor.
Sipas raportit, lista e termave që mund të censurohen nga aplikacionet e sistemit të telefonit Xiaomi, përfshirë shfletuesin e paracaktuar të internetit, aktualisht përfshin 449 terma në gjuhën kineze dhe se azhurnohet vazhdimisht.
“Kjo është e rëndësishme jo vetëm për Lituaninë, por për të gjitha vendet që përdorin pajisje Xiaomi”, ka theksuar qendra në raport.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.comLajmet kryesore
-
Aksioni i Frontex në Ballkan jep efekt, bien drastikisht kalimet e jashtëligjshme
-
Mbi 14 milionë turistë priten këtë vit, Balla: Policia e Shtetit i ka marrë të gjitha masat
-
Ose të dëgjojë SHBA-të ose të përgatitet për përshkallëzim – zgjedhja i takon Izraelit
-
Kurti për vizitën dy ditore në Gjermani: Kryefjala e vizitës ishte rëndësia e anëtarësimit të Kosovës në KiE