Lista Serbe takohet me Vuçiç-in, në prag të Referendumit në Serbi

Presidenti serb, Aleksander Vuçiç, është takuar me antarët e Listës Serbe për të diskutuar lidhur me referendumin për ndryshimin e Kushtetutës.

Referendumi do të mbahet në Serbi, por këta të fundit kanë kërkuar që mbahet edhe në Kosovë.

Qeveria e Kosovës, ka lejuar komunitetin serb në Kosovë të votojnë përmes postës ose Zyrës Ndërlidhëse të Serbisë ne Kosovë për referendumin e organizuar nga Serbia, por jo edhe të organizohet votim brenda territorit, për shkak se është shkelje e sovranitetit të shtetit të Kosovës.

“Qeveria e Republikës së Kosovës nuk është dakord me një synim të tillë, jo vetëm për shkak se kjo është në kundërshtim me ligjet dhe Kushtetutën tonë, por edhe për shkak se konsiderojmë që praktikat e mëhershme që i kanë aplikuar qeveritë e mëparshme, kanë qenë po ashtu në shkelje të ligjit dhe Kushtetutës sonë… Ne jemi kundër dhe natyrisht që, si Qeveri, qëndrimi jonë është edhe veprim i yni”, pati thënë kryeministri, Albin Kurti, qysh të mërkurën.

Me zhvillimet e fundit, Kurti ka kërkuar një seancë të jashtëzakonshme lidhur me referendumin.

Derisa, në takimin me Vuçiç-in ishin kryetari i Listës Serbe Goran Rakiq, nënkryetarët e Listës Serbe Igor Simiq, Dalibor Jevtic, si dhe Milan Radonçiq, i cili është në listën e zezë të Shteteve të Bashkuara të Amerikës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.