Ligji për abortin, Biden kundër Gjykatës Supreme

Të enjten e 2 shtatorit, presidenti i Shteteve të Bashkuara të Amerikës (SHBA), Joe Biden, ka dënuar vendimin e Gjykatës Supreme për të mos shqyrtuar ligjin, sipas të cilit abortet në Texas ndalohen pas javës së gjashtë të shtatzënisë.

Biden e ka konsideruar vendimin e Supremes si “një sulm të drejtpërdrejtë mbi të drejtën kushtetuese të gruas”.

Në SHBA, ky ligj shihet si një nga ndalimet më kufizuese të aborteve në pesë dekada.

Të tre gjyqtarët e emëruar nga Donald Trump, së bashku me dy nga anëtarët konservatorë të gjykatës, votuan për të refuzuar apelin.

Përmes një deklarate, Biden u zotua se administrata e tij do të veprojë për të “siguruar që gratë në Texas të kenë akses në aborte të sigurta dhe ligjore”.

Presidenti tha se do të drejtonte Zyrën e Këshilltarit të Shtëpisë së Bardhë që të “niste një përpjekje të tërë qeverisë për t’iu përgjigjur vendimit”.

Kjo, për të parë se “çfarë mjetesh ligjore kemi për të izoluar gratë dhe ofruesit nga ndikimi i skemës së çuditshme të Texas-it”.

I nënshkruar në maj nga guvernatori i Texas-it, Greg Abbott, ligji ndalon abortet, pasi aktiviteti kardiak embrional të zbulohet nga profesionistët mjekësorë.

Zakonisht rreth gjashtë javë pas shtatzënisë. Ekspertët e shëndetit riprodhues vlerësojnë se ndalimi do të parandalojë 85 për qind të grave shtatzëna, veçanërisht gra me të ardhura të ulëta, të abortojnë në shtetin e populluar nga 29 milionë banorë.

Ligjet nga Teksasi dhe Misisipi janë vetëm dy nga dhjetëra ligjet që janë miratuar vitet e fundit, që kufizojnë ashpër qasjen në abort në shtetet konservatore.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.