Liga Profesioniste dhe FSHF-ja, kërkesë Qeverisë dhe Kuvendit për ndryshimin e ‘Ligjit të Sponsorizimit’

Liga Profesioniste e Futbollit dhe Federata Shqiptare e Futbollit (FSHF) kanë zhvilluar mbledhje të përbashkët këtë të enjte të 2 dhjetorit. Fokusi i kësaj mbledhjeje ka qenë “Ligji i Sponsorizimeve” në sport.

Të dy organet kanë vendosur që t’i drejtohen me kërkesë zyrtare Qeverisë dhe Kuvendit të Republikës së Shqipërisë për të ndryshuar “Ligjin e Sponsorizimeve”.

Sipas tyre, kjo kërkesë është “jetike” për futbollin dhe sportin shqiptar.

Në mbledhjen e kësaj të enjte ishin të pranishëm, anëtarë të ligës, 10 presidentët e skuadrave të Abissnet Superiores, si dhe kreu i FSHF-së, Armand Duka.

Sipas njoftimit të FSHF-së, “Liga Profesioniste e Futbollit së bashku me FSHF-në do të riaktivizojnë negociatat me të gjithë institucionet dhe aktorët përgjegjës për të finalizuar ndryshimet ligjore që do t’i japin një frymëmarrje të madhe sportit shqiptar”.

Në bazë të ligjit aktual, për sponsorizimet e sporteve ekipore më të përhapura, subjekteve që operojnë në këtë fushë u njihet ulja deri në 20% mbi tatim fitimin. Ndërsa, për ata që investojnë në sporte më pak të përhapura, ulja është deri në 10%.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.