![](https://albanianpost.com/wp-content/uploads/2022/11/Screenshot-2022-11-23-195520.png)
Kryetari i Partisë Demokratike, Sali Berisha, deklaroi se liderët evropianë të cilët do të marrin pjesë në samitin BE-Ballkani Perëndimor më 6 dhjetor, do t’i mirëkuptojnë protestuesit.
Lajmi u bë i ditur gjatë mbledhjes me kryetarët e degëve të PD-së.
“Në datën 6 (dhjetor) nuk mblidhen 30 diktatorë, por lider të zgjedhur me votë të lirë, ndaj kam besim se ata kanë mirëkuptim për një popull që proteston për të njëjtat vlera që i kanë bërë popujt e tyre të lirë dhe demokratik”, u shpreh fillimisht Berisha.
Sipas kryedemokratit, protesta do të jetë paqësore pasi organizatorët e saj i dinë detyrimet që kanë për sigurinë dhe mikpritjen.
“E themi këtu, kjo do jetë një protestë paqësore. Ne i dimë detyrimet që kemi për sigurinë dhe për mikpritjen dhe këto nuk i ngatërrojmë në asnjë lloj rrethane, por zëri ynë do të jetë i pranishëm aty”, garantoi ish-kryeministri shqiptar.
Berisha e ka cilësuar këtë “përpjekje” si një betejë e cila ndalet vetëm në fitoren e PD-së.
Por, ai shtoi se kjo rrugë kërkon përkushtim, guxim dhe atdhetari.
“Le t’u bien sa të duan sirenave të tmerrit dhe të frikës, por ajo protestë do të rezonojë fuqishëm si zëri i qytetarëve që kërkojnë që vlerat demokratike duhet të jenë ato që duhet të sundojnë në Shqipëri”, theksoi kryedemokrati.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com