Liburn Aliu nuk e mohon se po përdorën materiale nga Serbia për punimet në Autostradën e Gjilanit

Ministri i Mjedisit, Planifikimit Hapësinor dhe Infrastrukturës, Liburn Aliu, në konferencë për media nuk i ka mohuar raportimet që janë bërë të hënën nga mediat se në ndërtimin e Autostradës së Gjilanit, janë duke u blerë produkte nga kompania serbe ‘AMIGA DOO’, e cila e ka selinë në Kralevë.

Ai tha se s’është i informuar rreth kësaj çështje, përveç se i ka parë raportimet në media, si gjithë të tjerët.

Aliu, ka deklaruar se kjo “është shqetësuese”, por që nuk mund t’i dinë të gjitha produktet që përdoren për realizimin e një projekti.

“Për autostradën në Gjilan, kjo që ka ndodhur me produkte të Serbisë, e kemi parë dje në media, është shqetësuese dhe do të merrem me këtë punë se si ka ndodhur kjo, kur ka ndodhur dhe si ka ndodhur…”.

I pyetur se si është e mundur që nuk është i informuar më shumë qysh tash, ai ka thënë se “shumë prej materialeve që porositen dhe blihen nga kompanitë, ministria nuk i di prodhuesit”.

“Nuk është e mundur të di çfarë lloje të produkteve përdorin kompanitë që realizojnë projektet, por natyrisht kur denoncohet një rast i tillë me kënaqësi merrem”.

Aliu, është pyetur edhe nëse është ftuar nga Prokuroria për hetimet që janë duke u bërë nga Tasa-Forca, ku po hetohet edhe zëvendësi i tij, Hysen Durmishi.

Edhe për këtë çështje, njëjtë si për blerjen e materialeve serbe, Aliu tha se ka informacion vetëm nga sa ka parë në media.

“Jo, mua nuk më ka thirrur hetuesia dhe sa i përket zëvendësministrit Hysen Durmishi, jam informuar nga mediat po ashtu”.

Pezullohet pëlqimi mjedisor për ndërtimin e inceneratorit në Ferizaj – shkarkohen dy komisione

Në konferencë ministri bëri të ditur se ka shkarkuar dy Komisione vlerësuese për menaxhimin e mbeturinave dhe dhënies së lejeve mjedisore.

Ai ka thënë se një kompani ka thënë se ka marrë pëlqimin për ndërtimin e inceneratorit termik për trajtimin e mbeturinave.

“Kemi pasur takime me një kompani që ka kërkuar të na prezantojë punën e tyre në lidhje me trajtimin termik të mbeturinave. Fillimi i majit të këtij viti, meqë me çështjen e mbeturinave jemi marrë, duke punuar edhe në strategji e edhe në trajtimin e mbeturinave të pareciklueshme”.

“Na erdhi një kompani që thotë se kemi marrë pëlqim nga ju për trajtim termik të mbeturinave, e edhe leje në komunën e Ferizajt e aty do të ndërtojmë incenerator. Vitin e kaluar ka pasur të lëshuar pëlqim mjedisor për incenerator në Varosh e që nënkupton djegien e 100 mijë tonë mbeturina e do të kishin efekt në tërë atë zonë që qytetarët s’janë të informuar”, deklaroi Aliu.

Sipas tij, për këtë projekt ka interesa nga dikush pasi sic e ka quajtur ai ky “është projekt i madh”.

“Është projekt i madh dhe normalisht ka interesa, kush e ka dhënë pëlqimin nuk e dimë me emra. Si është bërë dhënia e lejes, pra këto shkelje më kanë interesuar mua”.

“Kur ka ndodh kjo, pra ka ndodh në kohën sa unë kam qenë ministër dhe unë po dal po e denoncoj. Me emra, nuk e di kush e ka nënshkruar, nuk e di as kush e ka dhënë emrat nga autoritetet komunale”.

Teksa bëri thirrje edhe për reformime në Komisione.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.