Lëvizja strategjike e Berlusconi-t me debutimin e tij në TikTok

TikTok-u më së fundmi po përdoret edhe për përmbushjen e qëllimeve mirëfilli politike.

Ish-kryeministri italian, Silvio Berlusconi, ka bërë debutimin e tij në platformë në përpjekje për t’u bërë thirrje të rinjve në prag të zgjedhjeve kombëtare të këtij muaji.

“Përshëndetje djema, ja ku jam”, ka thënë 85-vjeçari në videon e krijuar.

TikTok-u përdoret në masë nga adoleshentët.

Berlusconi, i cili udhëhoqi qeverinë italiane tre herë, po planifikon një rikthim politik në zgjedhjet e 25 shtatorit.

E gjitha pasi dorëheqja në korrik e kryeministrit Mario Draghi e zhyti vendin sërish në një krizë politike.

Referuar sondazheve, aleanca midis partisë Forza Italia e Berlusconi-t, Ligës së Matteo Salvinit dhe Vëllezërit e Italisë së ekstremit të djathtë të Giorgia Melonit janë favoritët për të fituar zgjedhjet.

Prandaj dhe shfaqja e Berlusconi-t në TikTok është strategjike pasi Italia ka ulur moshën që votuesit duhet të arrijnë përpara se të kenë të drejtë të zgjedhin senatorë nga 25 në 18.

Kjo i ka hapur rrugën katër milionë të rinjve në moshë madhore për të fituar të drejtën për të votuar për dhomën e sipërme legjislative.

“Janë pesë milionë nga ju në këtë platformë dhe 60 për qind prej jush janë nën 30 vjeç dhe ndihem pak ziliqar që nuk jam i ri për këtë”, ka vijuar ai.

I ulur si zakonisht pas tavolinës së tij, udhëheqësi i Forza Italia ka treguar se do të përdorte platformën për t’u treguar të rinjve se si mund ta transformonte Italinë në “një vend që ju jep mundësi të reja dhe mundësi për të realizuar ëndrrat tuaja”.

Në një video të dytë, Berlusconi ka thënë një shaka për Vladimir Putin-in, Joe Biden-in dhe Papën.

Pas videos, ish-kryeministri arriti në më shumë se 350 mijë ndjekës në më pak se një ditë.

Ai nuk është i vetmi lider politik italian që ka krijuar një llogari në TikTok për t’u angazhuar me një audiencë më të re.

Një tjetër ish-kryeministër italian, Matteo Renzi, kreu i partisë politike liberale Italia Viva (IV), publikoi videon e tij të parë një ditë më parë.

Marrë nga “The Guardian”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.