“Lëshimet ndaj Vuçiç-it”, studiuesi malazez: Republika Srpska forcohet nëse arrihet marrëveshja me Kosovën

Danilo Kaleziç, studiues i lartë në Institutin Historik të Malit të Zi, në një intervistër për “The Geopost”, tha se presidenti i Serbisë, Aleksandër Vuçiç, nuk dëshiron të rrezikojë të përfshihet më aktivisht në situatat malazeze derisa të vlerësojë se sa dëm mund t’i sjellë në negociatat me Kosovën.

“Unë besoj se theksi i tij tani është ekskluzivisht në negociatat me Kosovën, ndërsa Malin e Zi ia lë popullit të tij nga një rreth i ngushtë që nuk janë gjithmonë aq efektivë sa ai kur një fushatë si ajo për Nikshiç-in e drejtoi personalisht, gjë që nuk do të thotë se nuk do të ketë ndikim”, tha ai.

Sa i përket tezës se Perëndimi është i gatshëm t’i bëjë lëshime Vuçiç-it në rajon – në Malin e Zi dhe Bosnjë-Hercegovinë – për të nënshkruar një marrëveshje me Kosovën, ai theksoi se në perceptimin e pjesëve të shoqërisë serbe, këto janë gjëra logjike, por shtoi se “konfigurimi i vetë Ballkanit Perëndimor thjesht ka ndryshuar”.

“Unë nuk besoj në teorinë e sakrifikimit të Malit të Zi në favor të Serbisë thjesht sepse Mali i Zi është anëtar i NATO-s, një pjesë shumë e rëndësishme e bregdetit të Adriatikut gjeostrategjikisht i përket Malit të Zi për momentin. Por, për fat të keq, shoh potencialin për të destabilizuar më tej Bosnjën dhe Hercegovinën”.

“Nuk do të isha aq pesimist të besoja në atë skenar që dikujt i bëhen lëshime territoriale, por që tolerohet destabilizimi i Bosnjës, pra forcimi i Republikës Srpska në kuptimin politik, kjo është shumë e sigurt”, shtoi ai.

Kur është pyetur nëse partnerët perëndimorë po e trajtojnë Vuçiç-in njëjti si presidentin rus, Vladimir Putin, në vitin 2014 kur ai aneksoi Krimenë, ai nënvizoi se ngjashmëria është e padiskutueshme në kuptimin politik dhe gjeografik.

“Do të shohim se çfarë do të prodhojë kjo politikë për Ballkanin Perëndimor kur bëhet fjalë për Serbinë. Ashtu si me [Slobodan] Millosheviç-in, pas përpjekjes së dështuar për ta emancipuar politikisht, ajo politikë u zëvendësua me politikën e bombave”.

“Nuk besoj se në këtë moment, në këtë kontekst, ajo politikë do të zëvendësohet me politikën e bombave, por do të nevojiten disa kërcënime më radikale. Do të ishte e dobishme për shoqërinë serbe që përfundimisht të çlirohej nga lloji i matricës politike në të cilën ndodhet”, shtoi Kaleziç.

Kaleziç në këtë intervistë potencoi se qëllimi kryesor i politikës hibride të ndikimit malinj të Rusisë në Ballkanin Perëndimor është eliminimi i presidentit aktual, Milo Gjukanoviç nga jeta politike sepse ai është personifikimi i politikës properëndimore.

Ai është i bindur se ndikimi rus do të forcohet me afrimin e datës së zgjedhjeve parlamentare në Mal të Zi më 11 qershor, me faktin se theksi i ndikimit rus këtë herë, siç vlerësoi ai, nuk do të lidhet ekskluzivisht me partinë pro-serbe dhe pro-ruse Fronti Demokratik.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.