Leksion për unionin dhe urime – reagimet e së djathtës në Evropë pas fitores së Melonit

Ndërkohë që numërimet e votave në Itali po vijojnë, Fratelli d’Italia, ka arritur një fitore historike me mbi 25 %.

Kështu, italianët kanë vendosur qartë se duan një qeveri të qendrës së djathtë të udhëhequr nga, Giorgia Meloni.

Reagimet e para për fitoren e shpallur tashmë nga vetë Meloni erdhën pikërisht nga liderët e së djathtës në Evropë.

“Urime Giorgia Meloni!”, shkruan në median sociale, Twitter, kryeministri polak, Mateusz Morawiecki, i cili njëjtë si liderja italiane, është pjesë e Partisë së Konservatorëve dhe Reformistëve Evropianë.

Një reagim pak më entuziast erdhi nga Franca, ku fitorja e Melonit është cilësuar si një leksion për Bashkimin Evropian.

“Italianët i kanë dhënë një leksion përulësie Bashkimit Evropian, i cili, me zërin e zonjës Von Der Leyen, ka pretenduar të imponojë votën. Asnjë kërcënim i asnjë lloji nuk mund ta ndalë demokracinë: popujt evropianë po ngrenë kokën dhe po pranojnë se e kanë në duart e tyre fatin”, shkruan Jordan Bardella, eurodeputeti i Partisë Kombëtare dhe kandidati për president i partisë së Marine Le Pen.

Nga ana tjetër, Balasz Orban, këshilltar politik i kryeministrit hungarez, reagoi menjëherë duke shkruar se në këto kohë të vështira, “ne kemi nevojë më shumë se kurrë për miq të vërtetë që ndajnë një vizion dhe një qasje të përbashkët ndaj sfidave të Evropës”.

“Rroftë miqësia mes Hungarisë dhe Italisë”.

Një mesazh urimi erdhi edhe nga Éric Zemmour, politikani i të djathtës ekstreme në Francë. Ai shkruan se fitorja e sotme ishte e dyta në kaq pak kohë në Evropë nga një koalicion i djathtë.

“Nga Suedia në Itali, javët e fundit po përjetojmë koalicionin e dytë fitimtar të krahut të djathtë në Evropë, thelbi i të cilit është në të vërtetë çështja e identitetit. I drejtoj të gjitha urimet e mia zonjës Meloni dhe shpreh gëzimin tim për popullin italian”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.