Lajçaku “s’i lëshon pa marrëveshje” kryenegociatorët e dinarit – rreth pesë orë nga nisja e takimit trepalësh në Bruksel

Pak para orës dhjetë në një prej zyrave të shërbimit të jashtëm të Bashkimit Evropian (BE) në Bruksel të Belgjikës nisi takimi trepalësh midis kryenegociatorëve të Kosovës e Serbisë – Besnik Bislimi dhe Petar Petkoviç – dhe Emisarit Special të BE-së, Mirosllav Lajçak, por përkundër se janë bërë gati pesë orë nga fillimi i takimit, ende s’ka asgjë të re rreth negociatave.

Lajçaku është shprehur optimist se mund të arrihet marrëveshje në takimin e shtatë për çështjen e dinarit, i cili vjen pas skadimit të periudhës tranzitore të Bankës Qendrore të Kosovës (BQK) për zbatimin e rregullores për operacione me para të gatshme. E negociatat do të orientohen në “kompromisin e propozuar” nga emisari evropian për zgjidhjen e krizës së dinarit.

“Do të jem nikoqir i kryenegociatorëve të Kosovës dhe Serbisë për diskutime që synojnë gjetjen e një zgjidhjeje të përkohshme dhe të qëndrueshme për ata që preken nga Rregullorja e BQK-së për operacionet me para të gatshme. Jam i sigurt se një marrëveshje mund të arrihet, por do të kërkoj fleksibilitet dhe kompromis nga të dyja palët”, deklaroi diplomati para takimit.

Për dallim nga praktika e mëparshme në procesin e dialogut, posaçërisht në nivel të kryenegociatorëve, ku emisari sllovak fillimisht zhvillonte takime të ndara me të dy delegacionet, pastaj kalonte në takime trilaterale pas gatishmërisë së palëve, këtë herë Lajçaku duket se nuk ka pasur nevojë për takime veç-e-veç sepse qëndrimet e të dy vendeve për dinarin dihen.

Zëdhënësi i BE-së, Peter Stano, deklaroi gjatë javës se blloku pret që takimi i radhës mes kryenegociatorëve të Kosovës dhe Serbisë për çështjen e dinarit serb të jetë rasti final për zgjidhje në bazë të propozimit të bërë nga Lajçaku, por nuk u zbardhën detaje konkrete të propozimit evropian që autoritetet kosovare e cilësuan konstruktiv për zgjidhjen e nyjes së dinarit.

“Ne presim që palët të kenë sjellje evropiane dhe të gjejnë një zgjidhje kompromisi. Kryenegociatorët mëtojnë të gjejnë zgjidhje përmes negociatave konfidenciale – këto janë mënyra evropiane për gjetjen e zgjidhjeve. BE-ja vazhdon t’iu ndihmojë atyre që të gjejnë kompromisin i cili është i nevojshëm sepse kjo ndikon në jetën e njerëzve”, shtoi Stano para dy ditësh.

Më 1 shkurt hyri në fuqi rregullorja e BQK-sё, nëpërmjet së cilës përcaktohet euro si e vetmja valutë ligjore që lejohet për transaksione me para të gatshme në Kosovë, duke ndaluar përdorimin e dinarit serb brenda territorit. Në zonat e banuara me shumicë serbe në vend, përveç valutës euro, deri tani është përdorur edhe dinari nën sistemin paralel të financuar nga Serbia.

Megjithatë, për shkak se palët nuk kanë qenë të gatshme për kompromis në gjashtë takimet e fundit, mbetet për t’u parë nëse lista e “skenarëve të dhunës” që mund të rezultojnë për shkak çështjes së dinarit dhe tensioneve ekzistuese do të zgjerohet apo do të gjendet një zgjidhje në dialog. Aktualisht, terreni i kërkimit të madh për “formulën e zgjidhjes” është duke vazhduar.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.