Lajçak: S’ka përparim në normalizimin e marrëdhënieve nëse s’ka progres në themelimin e Asociacionit

Nëse nuk ka përparim sa i përket Asociacionit të Komunave me Shumicë Serbe, është e vështirë të pritet përparim i normalizimit të marrëdhënieve në mes të Kosovës dhe Serbisë, ka thënë Miroslav Lajçak.

Kësto komente, i Dërguari Special i Bashkimit Evropian për dialogun Kosovë-Serbi, i ka bërë për median serbe me seli në Veri të vendit “KosovoOnline”, ku ka theksuar se Prishtina dhe Beogradi janë në rrugën evropiane dhe se i dinë se cilat janë obligimet e tyre.

“Për Serbinë është raporti vjetor i Komisionit Evropian që tregon saktësisht se çfarë duhet bërë. Për Kosovën është Marrëveshja e Stabilizim Asociimit. Përveç kësaj, në përputhje me vendimet e Këshillit të BE-së, normalizimi i marrëdhënieve është një parakusht për përparimin në rrugën evropiane, Unioni ka thënë qartë se nuk mund të importojë probleme të pazgjidhura dypalëshe”, tha Lajçak.

I pyetur nëse ka ndonjë progres sa i përket Asociacionit, diplomati sllovak ka potencuar se aktualisht “nuk ka përparim”.

“Mund të përsëris vetëm se gjithçka që është rënë dakord duhet të përmbushet, sepse parimi i përgjithshëm i ‘Pacta sunt servanda’ është parimi bazë i së drejtës kontraktuale, sipas të cilit kontrata e lidhur është ligji për palët kontraktuese, të cilat janë të detyruara të përmbushin detyrimet e tyre në mënyrën e përcaktuar nga kontrata dhe janë përgjegjës për përmbushjen e këtyre detyrimeve – dhe kjo vlen për të dyja palët, nëse nuk ka përparim në çështjen e Asociacionit, vështirë se mund të presim përparim në normalizimin e marrëdhënieve”.

Duke iu përgjigjur deklaratave se negociatat janë të vështira dhe për çështjen e dinarit, pas vendimit të Bankës Qendrore të Kosovës për ndalimin për pagesa të kësaj valute në territorin kosovar, ai ka theksuar se gjithmonë ka zgjidhje nëse ka vullnet të mirë.

“Nëse nuk ka zgjidhje – na mungon vullneti i mirë. Për fat të keq, atmosfera është e vështirë. Ka një atmosferë mosbesimi dhe konfrontimi. Është e vështirë të normalizohen marrëdhëniet në atë atmosferë. Çështjet që kanë natyrë më shumë teknike sesa politike janë mjaft të vështira për t’u zgjidhur”, shtoi.

Megjiatë, top-diplomati sllovak vlerëson që të dyja palët “janë përkushtuar për të gjetur një zgjidhje”.

I pyetur nëse ka ndonjë pikë takimi për çështjen e dinarit, kur nuk ka pasur progres deri më tani, Lajçak pohoi se nuk është e vërtetë që nuk ka pasur përparim, sepse, sipas tij, çdo takim sjell njëfarë progresi.

“Ndoshta më të vogël nga sa do të donin të shihnin njerëzit. Dhe në atë takimin e fundit, ne patëm një përparim. Sigurisht, ka kuptim dhe qëllim të takohemi, sepse ka njerëz që nuk kanë akses në paratë për të cilat kanë të drejtë. Për ta marrë atë, një person është gjithmonë në radhë të parë”, deklaroi.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.