Lajçak me kërkesë për shoqëritë në Kosovë dhe Serbi: S’ka të ardhme evropiane pa normalizim të marrëdhënieve, ta kuptoni këtë

Emisari i Bashkimit Evropian (BE) për dialogun, Miroslav Lajçak, ka thënë se ka mungesë të presionit për normalizim të marrëdhënieve mes Kosovës dhe Serbisë, por që kjo mungesë sqaron ai qëndron tek shoqëria.

Lajçak gjatë një interviste për mediumin “N1” të Sarajevës ndonëse u shpreh optimist për Marrëveshjen e Ohrit e cila sipas tij dërgon përpara, por që ngecjet vazhdojnë të mbesin në vendimet që marrin kryeministri i Kosovës, Albin Kurti dhe presidenti i Serbisë, Aleksandar Vuçiç.

“Sa herë që kryeministri i Kosovës Albin Kurti dhe presidenti i Serbisë Aleksandar Vuçiç bien dakord për disa hapa drejt normalizimit, përballen me kritika në shoqëritë e tyre”, deklaroi ai. 

Kërkesë e tij ka qenë që shoqëritë të kuptojnë se marrëdhëniet duhet të normalizohen.

“Është e qartë se elementi më i rëndësishëm për të përfunduar këtë proces është të ndihmojmë shoqëritë të kuptojnë se pa normalizimin e marrëdhënieve, nuk ka të ardhme evropiane për to”.

Ai gjatë intervistës tha se pyetja që kërkon përgjigje aktualisht është se si do të zbutet ndikimi i vendimit të Bankës Qendrore të Kosovës (BQK), për ndalimin e dinarit në komunat veriore.

“Fatkeqësisht, ky është realitet që është produkt i një niveli shumë të ulët të besimit mes dy shoqërive, ndërmjet Kosovës dhe Serbisë në përgjithësi”.

Lajçak, bëri të ditur se mandati i tij përfundon më 31 gusht dhe se sipas tij “është logjike që me lidershipin e ri të BE-së të fillojë një fazë e re e procesit”.

Ish-presidenti i Sllovenisë, Borut Pahor, mund të emërohet si i Dërguari i ardhshëm i Bashkimit Evropian për dialogun Kosovë-Serbi, duke zëvendësuar kështu në këtë pozitë diplomatin sllovak, Miroslav Lajçak.

Javë më parë u raportua në media se diplomati sllovak pritet të bëhet ambasador i BE-së në Zvicër.

Duke cituar burime diplomatike, Radio Evropa e Lirë shkroi se Lajçak do të nis mandatin në kryeqytetin zviceran, Bern, më 1 shtator të këtij viti.

Lajçak për 4 vjet mban pozitën e të Deleguarit Special të BE-së për dialogun Kosovë-Serbi.

Ndërsa mandati i tij pritet të përfundojë në fund të gushtit të këtij viti.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.