Lajme

Lajçak: Kemi mirëkuptim për planin e BE-së për de-eskalim – gati janë sanksionet edhe ndaj Serbisë


Miroslav Lajcak

Emisari Special i Bashkimit Evropian për dialogun mes Kosovës dhe Serbisë, Miroslav Lajçak, në një prononcim para gazetarëve të pranishëm në oborrin e Qeverisë së Kosovës pas takimit me kryeministrin Albin Kurti, ka thënë se është arritur njëfarë pajtueshmërie për planin tre-pikësht të BE-së për uljen e tensioneve në veri të Kosovës.

“Kjo nuk është një punë e as një situatë e lehtë. Kam pasur takim të rendesishëm, të sinqertë dhe të hapur. Ka një mirëkuptim për nevojën për të vazhduar me planin tre-pikësh të BE-së: de-eskalim, zgjedhje të reja dhe kthim në normalizim. Ne duhet të vazhdojmë diskutimin tonë për hapat konkretë”, ka thënë emisari Lajçak.

“Ende duhet të vazhdojmë diskutimet për hapat konkretë. Ai [kryeministri Albin Kurti] ka prezantuar pikëpamjet e tij, unë pikëpamjet e mia. Takim i gjatë, por shumë i rëndësishëm për të kuptuar pozitat e njëri-tjetrit sa më mirë, por jemi pajtuar të vazhdojmë përpara”, ka shtuar ndër të tjera diplomati sllovak.

Emisari Lajçak, i cili erdhi në Prishtinë pas kërkesës së Përfaqësuesit të Lartë për Politikë të Jashtme dhe të Sigurisë, Josep Borrell, ka thënë se bashkësia e organizuar ndërkombëtare i ka bërë gati “masat ndëshkuese” edhe ndaj Serbisë nëse ajo nuk lëvizë drejt qetësimit të situatës në veriun e Kosovës të banuar me serbë etnikë.

“BE-ja e ka bërë të qartë se ka sanksione të gatshme edhe për Serbinë. Ato do të zbatohen nëse Serbia nuk vepron në përputhje me kërkesat e BE-së. Dëshira ime është të mos kemi sanksione ndaj Kosovës e Serbisë”, ka thënë diplomati sllovak, ndërsa ka shtuar se pret që palët sa më shpejt t’i kthehen rrugës së dialogut.

Përfaqësuesi i BE-së të martën fillimisht zhvilloi një takim me presidenten Vjosa Osmani dhe më pas me kryeministrin Kurti, për të shqyrtuar mënyrën se si të zgjidhin krizën gjithnjë e më të mprehtë në veri, në mënyrë që t’i hapet rruga implementimit të pikave të Marrëveshjes së Brukselit (27 shkurt) dhe Aneksit të Ohrit (18 mars).

Emisari Lajçak pas vizitës së tij në Prishtinë, njoftoi se me mision të njëjtë do të niset edhe në drejtim të Beogradit për t’u takuar me presidentin e Serbisë, Aleksandër Vuçiç, në një kohë kur tensionet mes Kosovës dhe Serbisë janë ngritur në nivele shpërthyese.

Plani tre-pikësh i BE-së parasheh tërheqjen e njësive elitare të Policisë së Kosovës nga afërsia e ndërtesave komunale në veri, tërheqjen e kryetarëve të rinj shqiptarë nga ndërtesat komunale, shpalljen e zgjedhjeve të parakohshme atje dhe garancën e serbëve lokalë se do të marrin pjesë në zgjedhje.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore