Lajçak e informon Sarrazin-in për zhvillimet e fundit në dialog

I Dërguari Special i Bashkimi Evropian për dialogun Kosovë-Serbi, Miroslav Lajçak, është takuar këtë të mërkure me Emisarin e Posaçëm të Gjermanisë për Ballkanin Perëndimor, Manuel Sarrazin, të cilin e ka përditësuar rreth zhvillimeve të fundit në negociatat mes Prishtinës dhe Beogradit.

Lajmi u bë i ditur nga vetë Lajçak, përmes një postimi në platformën X, teksa takimet me Sarrazin-in i konsideroi gjithmonë të dobishme.

“Ne krahasuam shënimet për zhvillimet e fundit në rajon dhe e përditësova atë për gjendjen e lojës në Dialog”, shkroi diplomati sllovak, derisa shtoi se do të vazhdojnë që të qëndrojnë në kontakt të ngushtë për këto çështje.

Always useful to meet with my friend and 🇩🇪 Special Envoy for the Western Balkan @ManuelSarrazin. We compared notes about the latest developments in the region and I updated him on the state of play in the Dialogue. We will continue to stay in close touch. pic.twitter.com/HrWk4GIOiV

— Miroslav Lajčák (@MiroslavLajcak) November 29, 2023

Vendet perëndimore, sidomos pas sulmit terrorist në Banjë të Zveçanit, kanë shtuar përpjekjet e tyre diplomatike për të zgjidhur problemin mes dy vendeve fqinjëve ballkanikë.

Në këtë drejtim është edhe propozimi evropian për draft-statutin e Asociacionit të Komunave me Shumicë Serbe – të cilin Kosova e ka pranuar në parim.

Nga ana tjetër, Serbisë po i kërkohet që ta njohë de facto Kosovën.

Në fakt, këto që bashkësia ndërkombëtare, posaçërisht BE-ja dhe Shtetet e Bashkuara të Amerikës, po i kërkojnë nga Kosova dhe Serbia, janë gjëra që vetë vendet respektive janë zotuar se do t’i zbatojnë, përkatësisht me pranimin e Marrëveshjes Bazë (Bruksel, më 27 shkurt, Ohër, më 18 mars).

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.