Emisari Special i Bashkimit Evropian (BE) për dialogun Kosovë-Serbi, Mirosllav Lajçak, pas ciklit të ri të takimeve të pasuksesshme që u zhvilluan të enjten në Bruksel të Belgjikës për dinarin, njoftoi se palët u pajtuan që t’i vazhdojnë përpjekjet javën e ardhshme për të gjetur zgjidhje të përkohshme.
“Sot prita një sërë takimesh bilaterale me kryenegociatorët e Kosovës dhe Serbisë për të vazhduar diskutimet për një zgjidhje të përkohshme për ata që janë prekur nga vendimi i Bankës Qendrore të Kosovës (BQK). Palët ranë dakord të vazhdojnë përpjekjet javën e ardhshme bazuar në propozimet konkrete”, shkroi diplomati sllovak në platformën “X” të enjten.
Lajçaku takoi të enjten kryenegociatorët e Prishtinës dhe Beogradit, por ndryshe nga praktika e mëparshme në kuadër të procesit të dialogut në nivel teknik, nuk pati takim trepalësh mes tyre, por vetëm takime bilaterale të ndara. E diplomati sllovak u shpreh pas takimeve se përpjeket do të vazhdojnë javën e ardhshme bazuar në propozimin e BE-së për zgjidhje.
Zëvendëskryeministri i Kosovës, Besnik Bislimi, njëherësh shef i ekipit negociator të palës kosovare, tha pas takimit se pala serbe s’e pranoi as këtë hërë propozimin fillestar të Lajçakut për zgjidhje të përkohshme, por ata kanë insistuar në propozimin e tyre për çështjen e dinarit serb.
Kryenegociatori i Serbisë, Petar Petkoviç, pretendoi se pala serbe bëri “gjithçka” për të gjetur një zgjidhje, ndërsa akuzoi palën kosovare se erdhi në kryeqendrën evropiane pa komentuar idetë e BE-së për zgjidhjen e nyjes që, sipas tij, tregon se Kosova nuk dëshiron të pajtohet për asgjë.
Megjithatë, për shkak se palët nuk kanë arritur marrëveshje në takimin e fundit, terreni i kërkimit të madh për “formulën e zgjidhjes” pritet të vazhdojë javën tjetër, ndërsa mbetet për t’u parë nëse lista e “skenarëve të dhunës” që mund të rezultojnë për shkak çështjes së dinarit dhe tensioneve ekzistuese do të zgjerohet apo do të gjendet një zgjidhje në dialog.
Today, I hosted a series of bilateral meetings with the Chief negotiators of Kosovo and Serbia to continue our discussion on a temporary solution for those most affected by the CBK decision. The Parties agreed to continue our efforts next week based on concrete text proposals. pic.twitter.com/ZVmCfmUCo9
— Miroslav Lajčák (@MiroslavLajcak) April 18, 2024
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
