“Ky është sundim i ligjit”, Rohde mirëpret vendimin e Gjykatës për Klan Kosovën

Ambasadori gjerman në Kosovë, Jorn Rohde, e ka mirëpritur vendimin e Gjykatës Komerciale për ta shtyrë vendimin e Ministrisë së Industrisë, Tregtisë dhe Ndërmarrësisë, rreth pezullimit të certifikatës së këtij biznesi.

Përmes një shkrimi në rrjetin social ‘Twitter’, Rohde e ka komentuar shkurt këtë vendim.

“Ky është sundim i ligjit”, ka shkruar ai.

That's rule of law! https://t.co/g1MNGK0whl

— Ambassador Jörn Rohde (@GermanAmbKOS) August 3, 2023

Gjykata Komerciale, departamenti administrativ e ka aprovuar ankesën e Klan Kosovës, duke e shtyrë vendimin e Ministrisë së Industrisë, Tregtisë dhe Ndërmarrësisë (MINT), rreth pezullimit të certifikatës së këtij biznesi.

Lajmi është bërë i ditur përmes një komunikate për media të publikuar nga Gjykata Komerciale.

“Aprovohet si e bazuar kërkesa e paditësit Klan Kosova Sh.p.k., për shtyrjen e ekzekutimit të vendimeve”.

“Shtyhet ekzekutimi i Vendimit nr. 4566/01 i datës 28.07.2023 i nxjerrë nga Komisioni për Shqyrtimin e Ankesave për Regjistrimin e Bizneseve dhe Vendimit nr. 309/11 i datës 14.06.2023 i nxjerrë nga Drejtoria e Përgjithshme e Agjencisë për Regjistrin e Bizneseve në Kosovë, derisa Gjykata të vendos me vendim përfundimtar gjyqësor përkitazi me padinë e paditësit”, thuhet në komunikatën e Gjykatës.

Çka ndodhi me Klan Kosovën?

Më 14 qershor, Ministria e Industrisë, Ndërmarrësisë dhe Tregtisë, përmes një komunikate për media kishte marrë vendim që të pezullojë certifikatën e biznesit të Shoqërisë Tregtare televizionit Klan Kosova.

“Raportimet e mediave gjatë këtyre ditëve rreth kësaj çështjeje, kanë nxjerrë në pah dyshime të bazuara për keqpërdorim të mundshëm të pozitës zyrtare të punonjësve në Agjencinë për Regjistrimin e Bizneseve të Kosovës, e cila vepron në kuadër të Ministrisë së Industrisë, Ndërmarrësisë dhe Tregtisë. Si rrjedhojë, MINT ka bërë të gjitha angazhimet e nevojshme dhe menjëherë ka ndërmarr masat e qartësimit të brendshëm të gjendjes”, thuhej në njoftim.

Sipas MINT, në bazë të dhënave të shpërfaqura nga i gjithë procesi i regjistrimit e më pas transaksioneve tjera të shitblerjes së Shoqërisë Tregtare ‘KLAN KOSOVA’ SHPK, rezultojnë dyshime serioze të keqpërdorimit të detyrës zyrtare nga zyrtarë të ARBK-së, por edhe dyshime për keqpërdorim të autorizimeve ekonomike nga persona përgjegjës të kompanisë.

Komisioni i Pavarur për Media (KPM), pas një takimi që ka mbajtur më 16 qershor, i kishte dhënë afat prej 30 ditësh televizionit Klan Kosova, që të plotësojë dokumentacionin e nevojshëm të biznesit në ARBK.

Asociacioni i Gazetarëve të Kosovës (AGK), kishte bërë thirrje që të lejohet kohë dhe të mos ketë presione për plotësimin e dokumentacionit të kërkuar, në pritje të vendimit nga ana e Komisionit të Pavarur të Medieve.

Shtatë organizata kryesore ndërkombëtare për lirinë e mediave dhe grupet e gazetarëve kishin bërë thirrje që certifikata e përditësuar e biznesit të Klan Kosovës të pranohet nga komisioni i ankesave.

Po ashtu, kishin kërkuar që të ndërpriten menjëherë të gjitha përpjekjet e Qeverisë së Kosovës për t’i bërë presion medias.

Televizioni kombëtar privat, Klan Kosova, ka nisur transmetimin më 17 shkurt të vitit 2009.

“Demokracia vdes në errësirë”

Më 31 korrik, në mënyrë krejtësisht paqësore është protestuar kundër vendimit të Qeverisë së Kosovës për mbylljen e televizionit “Klan Kosova”.

Protesta e thirrur nga Asociacioni i Gazetarëve të Kosovës (AGK) shënoi edhe mbështetjen e mediave dhe organizatave të shoqërisë civile

Me fishkëllima nga sheshi “Zahir Pajaziti” protestuesit mbanin në dorë pankartën me moton e tyre: “Demokracia vdes në errësirë”.

Pothuajse të gjitha stacionet private televizive në vend kanë treguar solidaritetin e tyre me homologët nga “Klan Kosova”, duke transmetuar një mesazh në një sfond të zi me shprehjen “Demokracia vdes në errësirë”, që në vitin 2017 ishte bërë motoja zyrtare e gjigantit mediatik amerikan “The Washington Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.