Shqipëria

Kuvendi nis procedurën e zgjedhjes së Avokatit të Popullit, 14 emra në garë


Kuvendi i Shqipërisë ka nisur procedurën për zgjedhjen e Avokatit të Popullit, duke qenë se mandati pesë-vjeçar i drejtueses aktuale të institucionit, Erinda Ballanca, ka përfunduar në muajin maj 2022.

Erinda Ballanca, e cila ka mbajtur funksionin mandatin e fundit, do të jetë një prej emrave garues në raundin e ri të zgjedhjes.

Mirëpo në garë, do të jenë edhe 13 emra të tjerë, personazh të fushës juridike dhe sferës publike.

Bëhet fjalë për Jordan Dacin, Evis Ficon, Bledar Dervishajn, Ahmet Premçin, Endri Papajorgjin, Brikena Kasmin, Noriana Nikollan, Altin Goxhajn, Ermir Kapedanin, Olta Aliajn, Jorida Rustemin, Drita Avdylin dhe Ledio Brahon.

Në bazë ligjore, çdo person, i cili e njeh fushën e ligjit, i cili nuk është i dënuar penalisht dhe nuk ushtron një mandat të deputetit në Republikën e Shqipërisë, mund të garojë për postin.

Procedura, fillimisht parashikon mbajtjen e disa seancave dëgjimore nga Komisioni i përhershëm i Ligjeve. Ky i fundit verifikon përmbushjen e kritereve për kandidim të personave të interesuar për postin.

Në fund të seancave dëgjimore, Komisioni përpilon një listë me kandidatët dhe vlerësimet përkatëse për ta, duke e miratuar më pas me shumicë të thjeshtë.

Më pas, radha i takon mbështetjes që kandidatët duhet të marrin nga deputetët e Kuvendit.

Përkatësisht, një kandidati i duhet mbështetja e 28 deputetëve, për të qenë në mënyrë zyrtare kandidat për postin e Avokatit të Popullit.

Më pas, emrat që arrijnë të sigurojnë firmat futen në votim në Parlamentin e Shqipërisë.

Ky i fundit, me 84 vota, duhet të zgjedhje drejtuesin e ri të institucionit. Pra, nuk mjafton një shumicë e thjeshtë për t’u emëruar në krye të institucionit të lartë në vend.

/Albanianpost.com


Lajmet kryesore