Lajme

Kuvendi diskuton për Politikën e Jashtme të Kosovës


Kuvendi i Kosovës

Në seancën e Kuvendit të Kosovës të thirrur për këtë të martë, do të diskutohet për politikën e jashtme.

Deputetët e kësaj legjislature do të mblidhen në ora 13:00 për të debatuar rreth punëve që ka bërë dhe atyre që do të duhej të bënte kjo ministri e udhëhequr nga ministrja, Donika Gërvalla.

Ky debat me kërkesë të PDK-së ishte paraparë të mbahej javën e kaluar, por që nuk ndodhi për shkak të mungesës së kryeministrit, Albin Kurti dhe ministres së Jashtme, Donika Gërvalla, të cilët nuk gjendeshin në Kosovë.

“Ne jemi njoftuar nga mazhoranca në këtë rast që ministrja e punëve të jashtme dhe kryeministri nuk do të jenë në Kosovë sot, kur ne veç se e kishim caktuar ditën për këtë seancë”, kishte deklaruar në kuvend, shefi grupit Parlamentar të PDK-së, Abelard Tahiri.

“Prandaj, normalisht që një debat i tillë për politikën e jashtme nuk ka kurrfarë kuptimi që të mbahet dhe të mos kemi prezent ministren e jashtme dhe kryeministrin për disa çështje të cilat vazhdojnë të jenë shqetësim i joni dhe ne presim që të kemi përgjigje nga kryeministri dhe ministrja e jashtme. Me grupet e tjera parlamentare jemi pajtuar që ky debat do të mbahet në seancën e radhës, kur do të jenë prezent ministrja dhe kryeministri”, kishte thënë ai.

Deputetja e PDK-së, Blerta Deliu-Kodra është shprehur se kërkesa për debat erdhi për shkak të situatës së rënduar në të cilën gjendet politika e jashtme e Kosovës.

/Albanianpost.com


Lajmet kryesore