“Kushte që mund të lëvizin prapë dhe një po e kushtëzuar nga Kurti”

“Është thënë një po e kushtëzuar”, thotë analist politik dhe aktivist i shoqërisë civile Agon Maliqi për Albanian Post kur është pyetur për prezantimin e gjashtë parakushteve për themelimin e Asociacionit të Komunave me Shumicë Serbe të prezantuara nga kryeministri i Kosovës, Albin Kurti në Kuvend të enjten.

Madje për Maliqin, Kurti ka lëvizur nga pozicioni i tij, meqë më s’ka dilema se Asociacioni do jetësohet, por po flitet për formën e tij.

“Kosova ka lëvizur nga pozicioni i ngurtë, teksa tani flitet për detajet e asociacionit dhe jo për atë se a duhet të bëhet apo jo. Kushtet e vendosura janë pozicioni maksimal i Kosovës, por edhe të artikuluara në atë formë që më vonë të mund të ri-interpretohen”, tha Maliqi.

Ai thekson se propozimin franko-gjerman, “Kurti mund ta interpretojë si të dojë”.

“Çështja e njohjes – kryeministri po të dojë edhe mund ta interpretojë marrëveshjen bazë franko-gjermane si njohje”, shtoi Maliqi.

Për Maliqin, kushtet tjera edhe mund të harrohen, “siç u harruan kushtet për të mos u ulur në dialog pa kërkim falje”.

“Gjithsesi këtë pozicionim të Kurtit e shoh si hapje të derës drejt marrëveshjes”, potencon ai.

Ndryshe nga Maliqi, Demush Shasha nga Instituti Epik, konsideron që janë dy gjëra që lënë shije të keqe për mënyrën se si u prezantuan gjashtë kushte të Asociacionit, duke shtuar se “e para, këto kushte duken si improvizime dhe sensacion momental politik dhe jo si politikë njëmend koherente shtetërore”.

“Nëse kryeministri me të vërtet beson se këto janë ‘vijat e kuqe’ të Kosovës atëherë ai është dashur që në takime të mbajtura me liderët e opozitës ti njoftoj ata për këtë qëndrim dhe të filloj një dialog konfidencial me qëllim të shkëmbimit të mendimeve dhe krijimit të konsensusit të nevojshëm ndër-partiak për “vijat e kuqe”, ka shkruar Shasha në Facebook të enjten.

Ai vuri në pah se kryeministri duke i hedhur këto gjashtë kushte nga qielli në cirkun politik ai vetëm ka thelluar përçarjet në mes partive rreth kësaj çështje.

“E dyta, mënyra si u prezantuan këto 6 kushte për asociacionin duken jashtëzakonisht ngjashme me ato 4 kushte të dialogut: (1) nga CEFTA në SEFTA, (2) nënshkrimi i marrëveshjes së paqes dhe mos-agresionit, (3) reciprocitet bilateral në çështje të pakicave, dhe (4) largimi i Odaloviç-it nga delegacioni serb. Nëse mbani mënd edhe këto u patën prezantuar me një dozë improvizimi dhe sensacioni”.

Gjashtë kushtet e Kurtit janë zero kushte për themelimin e Asociacionit – një dekonstruktim i thjeshtë

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.