Kusari kërkon që raporti për RTK-në të publikohet menjëherë: Çdo vonesë rëndon imazhin tashmë të dëmtuar

Juristja e mediave, Flutura Kusari, ka kërkuar që Komisioni i formuar brenda Radio Televizionit të Kosovës, pas raportimit të një lajmi të rremë ku disa media të Kosovës u portretizuan si media të mbështetura nga presidenti i Serbisë, Aleksandër Vuçiç, të publikohet menjëherë pas finalizimit të saj.

“Pa vonesa dhe pa arsyetime koti procedurale. Çdo vonesë në publikimin e tij rëndon tutje imazhin tashmë të dëmtuar të RTK-së”, ka shkruar ajo në platformën sociale, Facebook.

RTK-ja në portal dhe në televizion, transmetoi një lajm nga një portal boshnjak, duke pretenduar se dy media të Kosovës financohen nga Serbia.

Vendimin redaktorial të RTK-së e kanë dënuar gazetarë të shumtë në Kosovë. Gjithashtu, disa gazetarë dhe redaktorë të RTK-së janë distancuar nga ky lajm.

Në artikullin skandaloz të “Slobodna Bosna” përmenden planet e supozuara të presidentit serb, Aleksandar Vuçiç, për të rritur ndikimin në Kosovë nëpërmjet kontrollit të dy mediave kosovare “Nacionale” dhe “Periskopi”.

Bordit i RTK-së, u mblodh për këtë çështje dhe premtuan që do të ketë masa, ndërsa punën po vazhdon pa pengesë drejtori i televizionit, Rilind Gërvalla, i cili në çdo mënyrë ka mbrojtur raportimin e RTK-së.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.