Kurti: Zgjidhja për kërcënimet e Serbisë ndaj Ballkanit Perëndimor është anëtarësimi i Kosovës në BE

Kryeministri i Kosovës, Albin Kurti, në konferencën për Diplomacinë, Sigurinë dhe Integrimin që është organizuar nga Komisioni i Jashtëm ka thënë se përgjigja e vetme ndaj kërcënimeve të Serbisë, është anëtarësimi i Kosovës në Bashkimin Evropian.

Kurti, para pjesëmarrësve ka thënë se Ballkani Perëndimor vazhdon të jetë i kërcënuar nga shteti serb.

“Kërcënimet e sigurisë në Ballkanin Perëndimor nga Serbia duhet të trajtohen duke përdorur të njëjtën qasje, pra duke i dhënë Kosovës statusin e vendit kandidat për Bashkimin Evropian dhe anëtarësimin në Këshillin e Evropës”, tha ai.

Tutje, kreu i ekzekutivit ka përmendur edhe veprimet e Serbisë ndaj Kosovës në dy vitet e fundit.

“Në rajonin tonë shohim se si regjimi autokratik në Serbi është nxitur nga pushtimi i Ukrainës nga ana e Rusisë. Në dy vitet e para të qeverisjes sonë, ata kanë sjellë katër herë ushtrinë te kufiri ynë, kanë sponsorizuar terrorizmin, kanë shpërndarë gënjeshtra dhe narrativa të rrejshme për të përligjur veprat e tyre ndaj Kosovës dhe rajonit”, ka thënë Kurti.

Prandaj, sipas tij diplomacia parlamentare është shumë e nevojshme aktualisht sesa kurrë më parë.

“Rruga drejt bashkëpunimit rajonal ka edhe pengesat e veta, ka ende hatër mbetje historike të cilat shpesh herë rrezikojnë që të na ndajnë. Ideja që disa etni raca dhe grupe janë superiore ndaj të tjerave është një paragjykim i vjetër”.

Ndërsa, kryetari i Kuvendit të Kosovës, Glauk Konjufca, në fjalimin e tij, ka bërë thirrje që të organizohet sërish një samit mes Bashkimit Evropian dhe Ballkanit Perëndimor i ngjashme me atë që ishte organizuar në vitin 2020.

“Do të bëja thirrje që aktivitetet që kanë qenë edhe në të kaluarën të organizuara nga Bashkimi Evropian, të mos i braktisim. Unë i inkurajoj edhe institucionet e BE-së, që njëra ndër konferencat më të rëndësishme që kishim së bashku vendet e Bashkimit Evropian mes Paralmentit Evropian dhe parlamenteve të Ballkanit Perëndimor, të mos ndërprehen”.

Ai tutje ka potencuar se ka pasur një mungesë të kësaj konference në vitin 2022 dhe 2023.

Liderët e Bashkimit Evropian më 6 dhjetor të 2022-ës kishin rikonfirmuar përkushtimin e palëkundur për anëtarësimin e Ballkanit Perëndimor në bllokun evropian.

Konjufca kërkon nga BE-ja një samit të ngjashëm si të 2020-së

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.