Kosova

Kurti udhëton për në Bullgari, merr pjesë në Forumin Ekonomik të Vjenës


Albin Kurti

Kryeministri i Kosovës, Albin Kurti, do të marrë pjesë në Forumin Ekonomik të Vjenës (VEF), i cili kësaj radhe mbahet në Sofje të Bullgarisë, njoftoi të dielen Qeveria e Kosovës nëpërmjet një komunikate për shtyp, ndërsa bëhet e ditur se në kuadër të VEF-it, i cili mbledh rreth vetes liderë, diplomatë e personalitete të shoqërisë civile, do të ketë edhe takime bilaterale.

“Fillimisht do të jetë i pranishëm në ceremoninë hapëse të forumit ku do të mbajë një fjalë rasti. Ndërkaq, nesër do të jetë pjesë e sesionit të diskutimit ‘Pyetje për vizionarët: Roli i inovacionit, teknologjisë dhe arsimit për bashkëpunimin ekonomik rajonal’”, thuhet në njoftimin e qeverisë.

Në ceremoninë hapëse të edicionit të 20-të të VEF-it që u organizua vitin e kaluar, kryeministri Kurti deklaroi se ky forum ofron mundësi për të vazhduar kontributin në bashkëpunimin rajonal, kauzën e rëndësishme të mirëkuptimit ndërkulturor dhe promovimin e paqes në kontinent.

E në bazë të njoftimit, pjesëmarrës në punimet e VEF-it në kryeqytetin bullgar do të jetë dhe kryeministri i Bullgarisë, Dimitar Glavchev, por edhe ministra, zyrtarë qeveritarë e personalitete evropiane. Kurti pritet të takojë edhe presidentin e Bullgarisë, Rumen Radev, sipas njoftimit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore