Kurti: Thjesht s’mund të besohet ideja që armët në Banjskë hynë pa përfshirjen e qeverisë serbe

Kryeministri i Kosovës, Albin Kurti, ka deklaruar se arsenali i madh i armëve që kishte hyrë e bën të pabesueshme idenë që ato të kenë hyrë në Kosovë, pa përfshirjen e Qeverisë së Serbisë.

Kurti përmes një shkrimi në platformën ‘X’, ka ritheksuar se armët janë prodhim shtetërorë i Serbisë.

“Armët dhe pajisjet tjera që u përdorën në sulmet terroriste të kësaj jave u prodhuan nga prodhuesit shtetërorë serbë të armëve ushtarake”.

“Ideja që 26 SUV-at ushtarakë (xhipat ushtarakë) dhe arsenali i madh i prodhuar nga shteti serb, hynë në Kosovë, të gjitha pa përfshirjen e qeverisë serbe, thjeshtë s’është e besueshme”, ka shkruar Kurti.

The weapons & other equipment used in this week's terrorist attacks were made by Serbian state-owned military arms producers. The idea that 26 military SUVs & a vast Serbian state-produced arsenal entered Kosova, all without the Serbian govt's involvement, is simply not credible. pic.twitter.com/TRt2lR4gkF

— Albin Kurti (@albinkurti) September 28, 2023

Sulmi terrorist i 24 shtatorit në Veri të Kosovës, ku mbeti i vrarë edhe një polic i Kosovës çoi në gjetjen e një arsenali të madh armësh të kontrabanduara në Kosovë.

Në përmasa tejet të mëdha, policia më pas gjeti raketahedhës, granatahedhës, pushkë të shumta automatike, pushkë snajper, automjete ushtarake, eksplozivë, detonatorë e shumë armë të kalibrit më të vogël.

Sipas Kryeministrit të Kosovës, Albin Kurti kapin vlerën e mbi 5 milionë eurove.

Ekspertë të sigurisë dhe fushës së terrorizmit, konsiderojnë se ka akoma shumë armë të cilat nuk janë gjetur e të cilat kanë hyrë për vite me radhë në Kosovë.

Megjithatë, pjesa më e madhe që është gjetur deri tani i takojnë prodhimit të vitit 2021.

“Ka sasi edhe më të mëdha” – S’i u fut gjithë ai arsenal i madh armësh në Kosovë dhe përse nuk u hetua as nga KFOR-i as nga Policia?

Në fshatin Banjskë të Zveçanit, më 24 shtator ndodhën sulme terroriste ndaj Policisë së Kosovës, ku u vra polici Afrim Bunjaku, u plagos polici Alban Rashiti si dhe u lëndua një tjetër.

Pas kësaj Policia e Kosovës reagoi duke kërkuar nga terroristët të dorëzohen, ata refuzuan të dorëzohen duke vazhduar sulmet me armë ndaj policisë.

Nga gjuajtjet me armë zjarri, katër terroristë u vranë dhe tetë janë arrestuar, ndërkaq katër prej tyre u morr vendim që të lirohen të mërkurën pasi për të njëjtit është thënë se nuk pati prova të mjaftueshme për përfshirjen e tyre në këtë rast.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.