Kurti takon kandidatë shqiptarë në zgjedhjet federale në Zvicër: Angazhimi juaj politik është i rëndësishëm për demokracinë

Pas takimit me Presidentin e Zvicrës, Alain Berset, kryeministri i Kosovës, Albin Kurti, ka takuar kandidatët shqiptarë të partive të ndryshme zvicerane në zgjedhjet federale të këtij viti në ndërtesën e Ambasadës së Kosovës në Bern.

Në një komunikatë për media e lëshuar nga Zyra e Kryeministrit, bëhet e ditur se Kurti ka përgëzuar kandidatët shqiptarë për angazhimin e tyre publik e politik në Zvicër, duke e konsideruar atë si dëshmi të mirë-integrimit të shqiptarëve atje, por edhe si shumë të rëndësishëm për demokracinë.

“Diskutuan për lidhjet ndërmjet Kosovës dhe Zvicrës dhe rolin e potencialin e bashkëpunimit ndërmjet Qeverisë dhe mërgatës në fushën e ekonomisë, edukimit dhe shëndetësisë”.

Kurti ka njoftuar kandidatët shqiptarë të cilët do të garojnë për ulëse në Këshillin Kombëtar të Zvicrës për me disa prej zhvillimeve kryesore në vend dhe politikave prioritare të qeverisë, teksa nga kandidatët u njoftua më shumë për temat e tyre elektorale.

“Ai i uroi të gjithë kandidatëve suksese në fushatën zgjedhore dhe në ditën e zgjedhjeve”.

Megjithatë, udhëtimi i Kurtit për në Zvicër nuk është pritur mirë në shtetin helvetik.

Mediat zvicerane aluduan se qëllimi i vizitës së Kurtit është mbështetja e Partisë Socialdemokrate të Zvicrës.

Partia Socialdemokrate, siç kishin raportuar disa nga mediat zvicerane, po tenton të përdor Kurtin për të kanalizuar kështu votat e diasporës shqiptare në Zvicër.

“Fakti që Kurti tani po bën fushatë për PS-në në rolin e tij si lider i partisë së majtë është tronditës”, tha kandidati i Këshillit Kombëtar dhe presidenti i FDP-së së Cyrihut, Përparim Avdili për mediumin zviceran “20 Minuten” ditë më parë.

Ndërsa Peter Keller, Sekretari i Përgjithshëm i Partisë Popullore Zvicerane e cila është në pushtet, e përshkruan paraqitjen e planifikuar të Kurtit si “plotësisht të gabuar”.

“Zvicra nuk duhet të ndërhyjë në fushatat zgjedhore të huaja dhe vendet e huaja nuk duhet të ndërhyjnë në fushatën zgjedhore zvicerane”, thekson Keller.

Zvicra kërkon nga Kurti që t’u garantojë serbëve shkallë adekuate të vetë-menaxhimit

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.