Kurti takon bashkëkryetarin e SPD-së: Kosova vazhdon të jetë palë konstruktive në dialog

Kryeministri i Kosovës, Albin Kurti, në margjinat e Kongresit të Partisë Socialdemokrate të Gjermanisë (SPD), në Berlin, është takuar me bashkëkryetarin e SPD-së, Lars Klingbeil, të cilit i ka thënë se vendi që ai udhëheqë vazhdon që të jetë palë konstruktive në dialogun e ndërmjetësuar nga Bashkimi Evropian.

Lajmi u bë i ditur nga vetë Kurti përmes një postimi në llogarinë e tij në platformën X, ku theksoi ta ketë bërë të qartë këndvështrimin e Kosovës se Ballkani i përket BE-së.

“Aspiratat e Kosovës në BE u konfirmuan me aplikimin tonë të fundit për anëtarësim. Gjithashtu ritheksova angazhimin tonë për dialogun, në të cilin Kosova vazhdon të jetë pala konstruktive”, shkroi Kurti.

Në margjinat e Kongresit të Partisë Socialdemokrate të Gjermanisë (SPD), gjatë ditës, Kurti ka takuar edhe Kancelarin e Gjermanisë, Olaf Scholz.

Përmes një postimi në platformën sociale, X, Kurti ka bërë të ditur se me Scholz ka diskutuar për forcën e marrëdhënieve dypalëshe në mes të Kosovës dhe Gjermanisë.

“Kënaqësi të marr pjesë në kongresin e partisë SPD të këtij viti, ku pata një takim të frytshëm me Olaf Scholz, duke nënvizuar forcën e marrëdhënieve tona dypalëshe dhe vizionin tonë të përbashkët si socialdemokratë që nxisin drejtësinë, përparimin dhe prosperitetin për qytetarët tanë”, ka shkruar Kurti.

Kurti ka udhëtuar të premten për në Berlin të Gjermanisë së bashku me ministrin e Kulturës, Rinisë dhe Sportit, Hajrulla Çeku, për të marrë pjesë në Kongresin e Partisë Socialdemokrate të Gjermanisë.

Ndërsa, të dielën kreu i ekzekutivit do të takojë pjesëtarë të mërgatës së Kosovës në Gjermani.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.