Kryeministri i Kosovës, Albin Kurti ka shkarkuar këshilltarin e tij nga komunitetet jo-shumicë Edison Beqiri.
Vendimi është marrë të enjten e 1 shkurtit, por që s’bëhen të ditura arsyet.
“Kryeministri i Republikës së Kosovës, në mbështetje të nenit 94 të Kushtetutës së Republikës së Kosovës, bazuar në nenin 9 (1.3 dhe 1.4), të Ligjit Nr.08/1-117 për Qeverinë e Republikës së Kosovës nxjerr: Vendim, Z. Edison Bećiri, lirohet nga posti i Këshilltarit Politik të Kryeministrit”.
“Z. Beqiri brenda tridhjetë (30) dite nga hyrja në fuqi e këtij Vendimi, është i obliguar të bëjë deklarimin e pasurisë, pas largimit nga funksioni, në pajtim me Ligjin Nr. 08/L-108 për deklarimin, prejardhjen dhe kontrollin e pasurisë dhe të dhuratave”, thuhet në dokumentin e siguruar nga Radio Televizioni i Kosovës.
Nga burimet e mediumit publik brenda ekzekutivit është thënë se Beqiri është liruar nga detyra pasi i njëjti është parë në një fotografi në ndërtesën në Dragash – e cila shërbente si komunë paralele.
Ky vendim pretendohet se ka ardhur edhe pasi i njëjti është verifikuar nga institucionet e sigurisë dhe inteligjencës.
Kurti, ka gjithsej 25 këshilltar, përfshirë ata të jashtëm.
Nga Qeveria, ishte thënë se 8 prej tyre janë të jashtëm dhe se nuk paguhen nga buxheti i shtetit.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
