Kurti s’e përmend fare kërkesën e presidentit të Zvicrës, thotë se diskutuan për progresin ekonomik të Kosovës

Marrëdhëniet ndërshtetërore, afërsia mes popujve, bashkëpunimi bilateral, shkëmbimet tregtare dhe zhvillimet e fundit ishte temat qendrore të takimit në mes të kryeministrit të Kosovës, Albin Kurtit dhe presidentit të Zvicrës, Alain Berset, thuhet në njoftimin e lëshuar nga Zyra e Kryeministrit.

Takimin në fjalë fillimisht e kumtoi Presidenca Zvicerane, përmes një komunikate për media, ku ndër të tjera nënvizohej fakti se Berst ka kërkuar nga Kurti, përkushtim për të garantuar një shkallë adekuate të vetë-menaxhimit për komunat me shumicë serbe, megjithatë Zyra e Kryeministrit nuk ka njoftuar publikun për këtë temë.

Komunikata për media e lëshuar nga Zyra e Kryeministrit ka cekur shkarazi çështjen e dialogut dhe raportet me Serbi duke theksuar se “Kurti e njoftoi presidentin Berset për zhvillimet e fundit në vend, për rezultatet e deritanishme të qeverisjes, politikat prioritare dhe për progresin e shënuar në rrafshin ekonomik, demokratik dhe të luftimit të korrupsionit, sikurse është evidentuar edhe nga raporte kredibile ndërkombëtare për dy vite rresht”.

Ndër të tjera komunikata thekson se Kurti ka shprehur “mirënjohjen e tij të thellë për mbështetjen e Zvicrës në çdo etapë të rezistencës, çlirimit, pavarësimit, shtetndërtimit e zhvillimit, si një nga vendet e para që e njohën Kosovën”.

“Ajo edhe sot vazhdon të përkrah shtetin e Kosovës, përfshirë në arenën ndërkombëtare, siç u dëshmua edhe me mbështetjen për aplikimin e Kosovës për anëtarësim në Këshillin e Evropës. Ai falënderoi Zvicrën edhe për rolin e saj në fushën e mbrojtjes dhe sigurisë, përmes misionit të Swisscoy, në kuadër të KFOR-it, të cilit së fundi i është vazhduar mandati deri në vitin 2026”.

Në mesin e politikave zhvillimore në të cilat shteti i Zvicrës ka luajtur një rol të rëndësishëm pozitiv, Kurti, sipas komunikatës, ka veçuar atë të arsimit dual i cili këtë vit akademik do të zgjerohet në gjithsej 12 profile të ndryshme, në 13 komuna dhe 21 shkolla profesionale dhe përmes së cilit synohet që të bëhet lidhja ndërmjet arsimit profesional dhe tregut të punës.

“Të dy folën për mundësitë në fushat me potencial për bashkëpunim më të thelluar dhe për marrëveshje të reja që e shtojnë atë, në veçanti në kuadër të EFTA-s”.

Zvicra kërkon nga Kurti që t’u garantojë serbëve shkallë adekuate të vetë-menaxhimit

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.