Kurti për zgjedhjet serbe: U mundova me mish e me shpirt për marrëveshje

Kryeministri i Kosovës, Albin Kurti, ka deklaruar se është munduar “me mish e me shpirt” për të arritur një marrëveshje me Serbinë për mbajtjen e zgjedhjeve serbe në Kosovë, pa u cënuar kushtetutshmëria e vendit, por kjo nuk u arrit dot.

“Unë jam munduar me mish e me shpirt që të jem shumë aktiv në bisedime për marrëveshje. Por, nuk e kemi arritur. Tash jemi ku jemi, nuk kemi çfarë të bëjmë”, deklaroi ai në një intervistë për televizionin shtetëror të Kosovës.

“Unë e di që edhe vendet e QUINT-it edhe Bashkimi Evropian më kanë kritikuar dhe e di që janë angazhuar sinqerisht për të gjetur një zgjidhje”, pohoi ai, kur u ballafaqu me deklarimet e ndërkombëtarëve për moskonstruktivitet.

Për deklarimet e presidentit serb, Aleksandër Vuçiç, i cili tha se Kurti “kërkoi nga qeveria serbe që ta lusin”, nuk ka dashur të flas.

“Nuk pata mundësi ta ndjek deklarimin e presidentit të Serbisë, pas mbledhjes së Këshillit të Sigurisë, sepse isha në një zoom me tre kongresist amerikanë”, pohoi Kurti.

Ai ka përmendur edhe takimet që janë mbajtur me delegacionin serb.

“Në të gjitha bisedimet të cilat janë zhvilluar, qoftë në Bruksel, qoftë nëpërmjet faktorëve evropianë, apo QUINT-it që kanë ndërmjetësuar, unë kam qenë i përkushtuar për marrëveshje, konstruktiv në qasje dhe kreativ me ide”, deklaroi Kurti për zgjedhjet serbe gjatë intervistës së tij në Radio Televizionin e Kosovës.

Ai tutje ka vazhduar duke thënë se mbajtja e zgjedhjeve të Serbisë në Kosovë është e mundur vetëm kur ka marrëveshje mes Kosovës dhe Serbisë.

“Në rastin e fundit në kemi kërkuar që të ketë një marrëveshje paraprake në bazë të së cilës do të mund të mbaheshin zgjedhjet edhe në Republikën e Kosovës, unë e kuptoj që ka qytetarë të Kosovës që kanë edhe nënshtësinë e Serbisë duan të votojnë edhe në zgjedhjet e Serbisë, por kjo është e mundur vetëm kur ka marrëveshje mes Kosovës dhe Serbisë”.

Sipas kreut të ekzekutivit, Serbia nuk mund të mbajë zgjedhje në Kosovë pa marrëveshje sepse kështu cenohet rendi ligjor i vendit.

“Nëse synojnë të mbajnë zgjedhje në Kosovë, pa marrëveshje kjo është cenim i Kushtetutës tonë i ligjit tonë dhe ne duhet të jemi në mbrojtje të Kushtetutës dhe ligjit. Ne nuk do të ishim kryeministra e ministra pa e pasur Kushtetutën e vendit dhe të shndërrohemi në spektator teksa dikush na cenon Kushtetutën”.

Ndërkaq për serbët e Kosovës, i pari i ekzekutivit ka thënë se gëzojnë të drejta të barabarta në çdo aspekt.

“Serbët e Kosovës i kanë të gjitha të drejtat e parapara me Kushtetutë edhe ligj, unë ju bëj thirrje që të gjitha atyre që të mos i braktisin institucionet, të qëndrojnë në organet shtetërore në institucionet e vendit tonë. Kosova nuk është vetëm e shqiptarëve, Kosova i ka edhe pakicat dhe pakicat nuk janë vetëm boshnjakët, romët, turqit janë edhe serbët dhe unë dëshiroj të dialogoj edhe me ta”.

Kurti: Do të udhëtoj për në SHBA gjatë muajit maj

Për vizitën e tij në Shtetet e Bashkuara të Amerikës, kryeministri i Kosovës u shpreh se kjo vizitë do të ndikojë në përforcimin e shtetit të Kosovës

“Ne kemi nevojë të raporteve të forcave bilaterale Kosovë-SHBA, kemi nevojë për më shumë investime në ekonomi edhe kemi nevojë më shumë për ngritje të kapaciteteve mbrojtjes”.

“Unë SHBA-të nuk e kam prioritet të shkoj atje për atë çfarë po ndodh në Bruksel, por përforcim të bilaterales, natyrisht se edhe dialogu me Kosovën me Serbinë hapet si temë, por nuk është çështja as themelore e as thelbësore”, deklaroi Kurti.

I pyetur nëse ka ftesë zyrtare për të udhëtuar në SHBA, ai bëri të ditur muajin në të cilin do të udhëtoj.

“Do të shkoj besoj në muajin maj, do të zhvilloj takimet me administratën Biden, me mërgatën tonë edhe shumë takime të tjera”.

Ndër të tjera, ai u arsyetua që këtë vizitë e ka vonuar shkak i angazhimeve.

“Në të gjitha shkëmbimet që i kemi ne i mirëpresim vizitat e njëri-tjetrit, por për mua në periudha të caktuara më duhet të i organizoj prioritet e SHBA-ve janë prioritet konceptual e funksional, por në anën tjetër nuk mund të shkoj në SHBA dhe të qëndroj dy ditë, ndoshta dikush edhe e ka bërë këtë gjë”.

365 ditëshi i Qeverisë Kurti

Për 365 ditë si kryeministër, Kurti ka theksuar dy prioritetet kryesore drejtësinë dhe punësimin, por përveç këtyre të dyjave ai potencoi se është bërë edhe më shumë në një vit të qeverisjes.

“Ka ndryshuar shumëçka, por jo për shkak se unë jam kryeministër por se kemi një kabinet të ministrave që nuk e kanë asnjë skandal, në qeveritë e më hershëm kishim skandale të ndryshme”.

Tutje vazhdoi duke përshkruar kabinetin e tij qeveritar.

“Nuk ka skandale ka njerëz të klasës së mesme të edukuar mirë të cilët nuk dëshirojnë të pasurohen, dëshirojnë të kenë jetë normale edhe të shërbejnë, sepse sektori publik për atë është”.

Ai gjatë bisedës tregoi disa gjëra që i konsideron si me të rëndësishme gjatë mandatit një vjeçar të tij.

“Buxheti i këtij viti është 2.75 miliardë euro është buxheti më i madh në Kosovë pas luftës, 9 për qind më i lartë se viti paraprak, i kemi 45 milionë euro për shtesat për lehonat dhe fëmijët, 35 i kemi për skemat sociale dhe pensionale, pensionet në përgjithësi i kemi rritur për 11 për qind, për personat me aftësi të kufizuar i kemi rritur për 33 për qind, nuk ka person nën 100 euro më”.

“2 milionë përkrahje për Luginën, 24 milionë euro shtesë për barna esenciale, pastaj i kemi ndarë 40 milionë euro për mbështetje për prodhuesit vendor për punësimin e garantuar për të rinjtë 20 milionë, në investime për ndërmarrje publike ku përfshihen Trepça dhe Telekomi sidomos 40 milion”.

“Bujqësia 70 milionë euro dhe tash çfarë kemi bërë me këto subvencionet e fundit është e jashtëzakonshme, po ja heqim akcizën 36 cent në litrën e naftës për bujqit gjithashtu po i japim edhe tre cent për të gjithë ata të cilët për kilogram e dorëzojnë në mulli rendimentin e tyre drithërat dhe gjithashtu po i financojmë edhe me 150 euro për hektarë plehur artificial”.

Ndërkaq, sqaroi edhe atë që e kanë konsideruar si ndihmesë shkaku i rritjes së çmimeve.

“Tjetra është që nga 100 euro i kemi dhënë për 300 mijë familje për muajin nëntor si përgjigje ndaj rritjes së çmimeve dhe e kemi fuqizuar për muajt nëntor dhe dhjetor asistencën social”.

Më 20 tetor të vitit 2021, zëvendëskryeministri Besnik Bislimi ka thënë se që nga fillimi i punës së Qeverisë aktuale e deri në atë kohë, numri i të punësuarve është rritur me 9 mijë e 300 persona.

Në dhjetor të vitit 2021, kryeministri Albin Kurti ka thënë se “vetëm me Pakon e Ringjalljes Ekonomike është arritur që të regjistrohen 10 mijë vende të reja të punës.

Më 31 dhjetor të 2021, ministri i Financave dhe Transfereve i Kosovës, Hekuran Murati, ka thënë se nëse krahasohet muaji shtator i vitit 2021 me shtatorin e vitit 2020, “figurojnë mbi 25 mijë vende të punës më shumë”.

Agjencia e Statistikave të Kosovës ende nuk i ka publikuar të dhënat për shkallën e punësimit në Anketën e Fuqisë Punëtore, për nëntëmujorin e fundit të vitit 2021.

Në mënyrë zyrtare nuk ka akoma të dhëna zyrtare nga kjo agjenci se sa ka qenë shkalla e punësimit në Anketën e Fuqisë Punëtore, gjatë periudhës së qeverisjes së kryeministrit Kurti.

Për tremujorin e parë të vitit 2021, shkalla e punësimit në Anketën e Fuqisë Punëtore ka qenë 29.4 për qind, ndërsa për tërë vitin 2020 kjo shkallë e punësimit ka qenë 28.4 për qind.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.