Kurti për udhërrëfyesin për energjinë: Po e ndalim një gjakderdhje financiare në veri të vendit

Pa filluar trajtimin e pikave të rendit të ditës në mbledhjen e paracaktuar të Qeverisë, kryeministri Albin Kurti zgjodhi të flasë për udhërrëfyesin e dakorduar një dit ëmë parë në Bruksel ndërmjet Kosovës dhe Serbisë për energjinë elektrike.

“Pas më shumë se 20 vitesh, buxhetit të Republikës së Kosovës do t’i kursehen dhjetëra milionë euro në vit, të paguara më herët për mbulimin e kostove energjetike të veriut të vendit”, nisi kryeministri.

Ai tha se katër komunat në veriun e Kosovës, do të kalojnë në një rend të rregullt të furnizimit, faturimit dhe inkasimit të pagesave për konsumin e energjisë elektrike, në bazë të sistemit rregullativ dhe ligjor të Republikës së Kosovës.

“Udhërrëfyesi i dakorduar në takimin e djeshëm në Bruksel do ta mundësojë këtë. Bashkimi Evropian do ta mbikëqyrë zbatimin e këtij dakordimi. E me zbatimin e këtij udhërrëfyesi, do të mundësohet përfundimi definitiv i një problematike të trashëguar, tё pagesёs sё energjisё nё katër komunat nё veri tё vendit”, tha Kurti.

“Kemi trashëguar shumë gjëra që nuk kemi dashur. Po bëjmë më të mirën me atë çfarë kemi trashëguar. Siç jemi zotuar, pas 20 vitesh po e ndalim një padrejtësi dhe gjakderdhje financiare në atë pjesë të vendit dhe po përfundojmë një problematikë në sektorin e energjisë”, shtoi ndër të tjera ai.

Kryeministri shtoi se ky sektor është prioritet për Qeverinë e Republikës së Kosovës, pasi prekë çdo aspekt të jetës së qytetarëve.

“Për këtë arsye ne kemi marrë përsipër detyrën e rëndësishme të zhvillimit të një Strategjie Kombëtare të Energjisë, në mënyrë që sektori ynë i energjisë të niset për një tranzicion të drejtë energjetik – tranzicion i cili do të diversifikojë miksin e energjisë, do të ruajë sigurinë e furnizimit, do të promovojë energjinë e pastër dhe bashkëpunimin rajonal, në radhë të parë me Shqipërinë, por edhe me vendet e tjera”.

Strategjia e Energjisë 2022-2031, sipas Kurtit po finalizohet përmes proceseve demokratike, transparente e gjithëpërfshirëse.

“Ministrja Artane Rizvanolli, po vazhdon konsultimet publike anëmbanë Kosovës për draftin e Strategjisë së Energjisë, si dhe shqyrtimet e vazhdueshme me profesionistë dhe ekspertë të shumtë. Andaj shpresoj që sa më shumë qytetarë do të bashkohen në këto diskutime, që të kemi një strategji e cila u shërben më së miri të gjithëve, e një sektor të energjisë që furnizon e trajton në mënyrë të barabartë të gjithë qytetarët”.

Ky udhërrëfyes i dakoruar një ditë më parë, garanton trajtim të barabartë për të gjithë qytetarët e Kosovës në raport me konsumin dhe pagesën e energjisë elektrike.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.