Kurti: Nga 100 euro për të gjithë të punësuarit në Kosovë

Në muajin prill, pensionistët e Kosovës do të marrin nga 100 euro shtesë.

Kështu ka deklaruar Kryeministri i Kosovës, Albin Kurti në konferencën e Përbashkët me Ministrin e Financave, Hekuran Muratin, ku prezantoi masat e reja që ka ndërmarrë Qeveria në kuadër të pakos për ringjalljen ekonomike.

“Nga kjo mbështetje do të përfitojnë të gjithë ata që marrin pension bazik, pension kontribut pagues, pension për aftësi të kufizuar, pension të veteranit e kështu me radhë”, tha Kurti.

Për të gjitha familjet të cilat janë nën masën e asistencës sociale, shuma e parave që ata marrin do të dyfishohet poashtu përgjatë muajit prill.

“Për herë të parë”, siç potencoi kryeministri, “do të mbështesim me shumë të njëhershme prej 100 euro të gjithë punëtorët e sektorit privat, pra rreth 300 mijë punonjës”.

“E në kuadër të kësaj mbështetje për të punësuarit do të ndajmë shumën e njëhershme prej 100 euro edhe për mbi 80 mijë zyrtarë publik”.

“Për herë të parë po ashtu”, ritheksoi kryeministri në kuadër të pakos për ringjallje ekonomike, qeveria e tij do të ndajë për “të gjithë studentët e republikës një shumë të njëhershme prej 100 euro”.

“Nga kjo mbështetje do të përfitojnë rreth 80 mijë student”.

Për shtresat e varfra, kryeministri tha se janë duke vazhduar të shpërndajnë  40 mijë pako ushqimore dhe do të vazhdojnë “mbështetjen për ofrimin e shujtave përmes kuzhinave popullore”.

“Vlera totale e të gjitha këtyre masave është mbi 100 milion euro dhe nga këto masa e kjo shumë do të përfitojnë rreth 800 mijë qytetarë ose praktikisht secila familje e Kosovës”, theksoi kryeministri Kurti.

Në këtë konferencë për medie, Kurti paralajmëroi se në mbledhjen e ardhshme të Qeverisë së Kosovës, e cila do të mbahet nesër, të mërkurën, do të miratohet projektligji i cili do ti hapë rrugë ligjit të pagës minimale në vlerë prej 264 euro bruto, apo 250 euro neto dhe heqjen e tatimit për 250 euro pagë.

“Pra edhe do ta rrisim pagën minimale edhe do ta lirojmë nga tatimi”, tha ai.

“Nga rritja e pagës minimale do të përfitojnë rreth 100 mijë punëtor të Kosovës kurse prej heqjes së shkallës së parë tatimore do të përfitojnë të gjithë punëtorët”.

Në anën tjetër Ministri i Financave, Hekuran Murati ka bërë të ditur se përfitues nga kjo pako ekonomike do të jenë të gjitha kategoritë të cilët janë përballur me vështërsi ekonomike.

“Në radhë të parë do të jenë pensionistët të cilët do ta marrin këtë mbështetje shtesë me pensionin e radhës që pritet të shpërndahet në fund të kësaj jave, pastaj do të jenë edhe pagat e sektorit publik kurse për punëtorët e sektorit privat dhe për studentët gjatë ditëve në vijim do të hapim procesin e aplikimit”.

Megjithatë Sipas Muratit, për mbështetjen që Qeveria ka paralajmëruar duhet të bëhen edhe disa ndryshime ligjore.

“Duhet të kemi edhe disa ndryshime ligjore fillimisht është marrëveshja me bankën botërore që duhet të ratifikohet në Kuvend pastaj është ligji për pagën minimale i cili do të prezantohet në mbledhjen e radhës e Qeverisë si dhe është ligji për rishikimin e buxhetit”, ka shtuar ai.

Ligji për pagën minimale, sipas Muratit përveç që rrit pagën, ofron edhe rritje të pagës neto për të gjithë punonjësit

“Ligji për pagën minimale e cila ritë pagën për të gjithë përfituesit të cilët janë nën nivelin 264 euro ofron edhe rritjen e pagës neto për të gjithë punonjësit si sektorin privat si publik, pra çdokush që e ka pasur pagën mbi 250 euro do të përfitojë diku rreth 80 euro në vit”.

Masat e ndërmarra vitin e kaluar në kuadër të Pakos për Ringjallje Ekonomike

Kurti në këtë konferencë rikujtoi vendimin për ndarjen e shtesave për lehona dhe fëmijë. Vendim ky i marrë vitin e kaluar në kuadër të masave për ringjallje ekonomike.

“Deri më tani kemi 13 mijë e 285 lehona, dhe mbi 146 mijë fëmijë që përfitojnë nga këto shtesa”.

“Mbështetëm me 150 euro ata që kanë humbur familjarët nga COVID 19, e kur familjari ishte staf mjekësor mbështetja arrinte vlerën në 10 mijë euro. Nga jo masë përfituan mbi 2 mijë familje”, rikujtoi kryeministri.

“Pensionin bazik e rritëm për 11%, kurse atë për persona me aftësi të kufizuar për 33%”.

“Në nëntor të vitit 2021 ndamë edhe nga 100 euro mbi këtë rritje. E nga kjo përfituan rreth 300 mijë pension marrës”.

Ndërsa asistencën sociale prej së cilës përfitojnë 25 mijë familje “e kemi rritur prej 30%”.

“Për shtresat e cenueshme të shoqërisë ndamë 10 mijë e 500 kupon ushqimorë, mbi 200 mijë shujta, përmes 13 kuzhinave popullore”.

“Deri më sot në kuadër të pakos ndamë mbi 300 milion euro për mbi 700 e 40 mijë përfitues”, përsëriti Kryeministri.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.