Kurti: Në më pak se 2 vjet vizitova Britaninë e Madhe 3 herë

Kryeministri i Kosovës, Albin Kurti, përmes një postimi në rrjetin social “Facebook”, ka thënë se ka përfunduar vizitën e tij “të tretë zyrtare në Mbretërinë e Bashkuar në më pak se dy vite”, ku edhe ka njoftuar për takimet që i ka pasur atje.

Kurti theksoi se gjatë qëndrimit dy ditor në Britani, është mirëpritur “ngrohtësisht nga aleatë e partnerë të Kosovës si në ekzekutivin Britanik ashtu edhe në Parlament”.

“Me Sekretarin e Punëve të Jashtme, James Cleverly me të cilin jam në kontakt e komunikim të rregullt, diskutuam për marrëdhëniet dypalëshe, për zhvillimet në Kosovë dhe për rëndësinë e shtensionimit të plotë të situatës në katër komunat në veri të vendit. Republika e Kosovës është përherë mirënjohëse për mbështetjen e palëkundur e të pandërprerë të Mbretërisë së Bashkuar”, shkroi ai në Facebook.

Ndërkaq, duke treguar për takimin me deputeten dhe Kryetaren e Komisionit për Politikë të Jashtme të parlamentit britanik, Alica Kearns, ai theksoi se ajo “ka qenë një zë i fuqishëm mbështetës i Republikës sonë në Parlamentin e Mbretërisë së Bashkuar”.

“Me të diskutuam për veprimet agresive dhe sulmet e sponsorizuara nga Serbia mbi KFOR-in, Policinë e Kosovës dhe gazetarët në veri të vendit dhe qëndrimin tonë parimor e demokratik për depërshkallëzim që në qendër ka sundimin e ligjit”.

Tutje, kreu i ekzekutivit kosovar pohoi se “jemi me fat që në Pallatin e Westminster kemi shumë miq”, duke treguar se është takuar edhe me deputetë të Grupeve Parlamentare të Mbretërisë së Bashkuar, APPG (All Party Parliamentary Group), konservatorë, liberal-demokratë e laburistë.

“Nga Partia Laburiste, një takim të ndarë zhvillova edhe me Sekretarin në hije të Punëve të Jashtme, David Lammy dhe Ministrin në hije për Evropë, Stephen Doughty”.

“E miq laburistë kemi edhe jashtë institucioneve por që ishin kyç aq sa i drejtonin ato. Republika e Kosova dhe populli i saj i janë përherë mirënjohës ish-kryeministrit britanik Tony Blair për rolin dhe vendosshmërinë e tij për ndërhyrjen humanitare në Kosovë e cila ndali përfundimisht gjenocidin e shtetit serb mbi shqiptarët vendas”.

Në takimin me Blair-in, kryeministri Kurti bëri me dije se të njëjtin e ka njoftuar “për arritjet e Kosovës në rrafshin ekonomik, social, të të drejtave të njeriut, dhe institucional, duke ndarë me të bindjen që Kosova është histori e etabluar e suksesit të dyfishtë: intervenimit të NATO-s dhe i bashkëdyzimit të progresit ekonomik dhe atij demokratik”.

Lajmin për lirimin e tre policëve të Kosovës, të cilët u kidnapuan nga xhandarmëria serbe me 14 qershor, Kurti tregon e ka marrë gjatë qëndrimit në Londër.

“13 ditë pas ata janë në Kosovë e me familjet e tyre. Nesër do t’i takoj për t’i falënderuar për qëndresën dhe për t’u uruar mirëseardhje”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.