Kurti në Forumin Strategjik të Bledit: Të fillojë zbatimi i plotë i tri marrëveshjeve që kemi nënshkruar në Berlin

Kryeministri i Kosovës, Albin Kurti, po vazhdon të qëndrojë në Bled të Sllovenisë, ku po merr pjesë në forumin strategjik atje, bashkë me shumë liderë të Ballkanit Perëndimor dhe të Evropës, derisa ka ndarë përshtypjet e tij nga darka e mbrëmshme jo formale.

Qeveria e Kosovës përmes komunikatës njoftoi se gjatë këtij takimi Kurti ka diskutuar për rëndësinë e zbatimit të marrëveshjeve të arritura në 2022 në Procesin e Berlinit, duke përmendur “zbatimin e plotë të tri marrëveshjeve të Berlinit”, para samitit të Tiranës.

“Më 1 janar 2024 të gjithë qytetarët e Republikës së Kosovës do të lëvizin pa viza në vendet e Bashkimit Evropian ndërkohë që do t’ju kërkohen viza për në Bosnje dhe Hercegovinë”, shkroi Kurti duke theksuar kështu faktin që Bosnja dhe Hercegovina nuk po e miraton marrëveshjen e arritur për lëvizjen e lirë mes gjashtë vendeve të Ballkanit Perëndimor të arritur në kuadër të Procesit të Berlinit.

“Në këto 50 ditët e mbetura para Samitit në Tiranë, është e rëndësishme që të fillojë zbatimi i plotë i tri marrëveshjeve që kemi nënshkruar në Berlin”, ka deklaruar Kurti, thuhet në komunikatën e Zyrës së Kryeministrit.

Ndërsa u diskutua edhe për bashkëpunimin rajonal, anëtarësimin e Ballkanit Perëndimor në Bashkimin Evropian dhe sigurinë.

“Kryeministri mirëpriti thirrjet e Kryeministrit të Sllovenisë, Robert Golob dhe presidentit të Këshillit Evropian, Charles Michel, për fokusim në zgjerimin e Bashkimit Evropian si dhe mundësitë për vendet e Ballkanit Perëndimor dhe nënvizoi respektimin e pakicave dhe njohjen reciproke si parakusht”, thuhet në komunikatë.

“Bashkimi Evropian duhet të zgjerohet. Ballkani Perëndimor duhet ta mbështesë zgjerimin dhe vendet aspirante duhet të kryejnë reformat të cilat përshpejtojnë anëtarësimin”.

Gjatë këtij takimi u diskutua edhe për temën “Solidaritet për Sigurinë Globale”.

I kthyer tashmë në një traditë që merr jetë në fund të verës, “Bled Strategic” hap zyrtarisht punimet ketë të hënë të 28 gushtit.

Si një platformë gjithëpërfshirëse vihet re një pjesëmarrje e larmishme personalitetesh nga fusha e politikës, diplomacisë, ekonomisë, sektorit privat e publik dhe akademikë, të cilët mblidhen së bashku për të diskutuar sfidat kryesore në shekullin e XXI-të.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.