Kurti: Me Qeverinë time ushtrinë e kemi më të fortë e më të përgatitur

Kryeministri i Kosovës, Albin Kurti, përmes një postimi në Facebook të shtunën, ka thënë se me qeverisjen e tij ushtria është më e “fortë” dhe më e “përgatitur”.

“Sepse ajo tani ka më shumë se dyfishim buxheti e në vitin 2023 e kishte më shumë se 2% të BPV-së, kriter ky për NATO; investimet në armatim i ka trefish më të mëdha; ndërkaq në kazerma ka 1852 ushtarë më shumë, të cilëve do t’i bashkohen edhe 600 rekrutë të tjerë sivjet, përveçse pajisje ushtarake moderne që nuk i kemi pasur më herët”, shkroi Kurti.

“Në mesin e tyre dronët e njohur luftarak Bayraktar. Ndërsa në proces të blerjes dhe përmbushjes së obligimeve të marrëveshjes është edhe sistemi amerikan raketor anti-tank ‘Javelin’, krahas edhe shumë blerjeve tjera”, shtoi.

Kryeministri bëri me dije se 3325 ushtarakë janë trajnuar jashtë vendit “duke përfituar kështu dije të vlefshme ushtarake”, derisa shtoi se u realizuan misione bashkëzbarkimi me ushtrinë amerikane dhe atë britanike “duke dëshmuar kapacitetin tonë për t’i kontribuar paqes”.

“Morëm pjesë në Defender Europe 21 dhe 23, e do të jemi pjesëmarrës si nikoqir në Defender Europe 2025, duke përfituar përvoja të jashtëzakonshme në ngritjen e kapaciteteve dhe përgatitjeve luftarake krah për krah me vendet partnere të NATO-s. Në kuadër të Grupit të Kontaktit për Mbrojtjen e Ukrainës kontribuuam në trajnimin e ushtrisë ukrainase dhe përgatitëm dy pako të mbështetjes ushtarake për Ukrainën”.

Kurti theksoi se janë duke vazhduar që ta rrisin bashkëpunimin bilateral dhe praninë e diplomacisë ushtarake përmes nënshkrimit të marrëveshjeve ndërkombëtare me 15 shtete dhe akreditimit të atasheve ushtarakë të Kosovës në Holandë, Slloveni dhe Kanada, “gjersa jemi në proces në Zvicër dhe Itali”.

Në konsultimet bilaterale me ShBA, ai tha se “vendosëm prioritete të bashkëpunimit për vitet në vijim, teksa kemi arritur marrëveshje kornizë ushtarake me Turqinë”.

Po ashtu, ai përmendi edhe përurimin e Qendrës Shtetërore Trajnuese për Siguri Kibernetike.

“Hoqëm kufizimin në numër të ushtarëve të Forcës së Sigurisë së Kosovës dhe e hapëm atë për çdo të re e të ri deri në moshën 25 vjeç”.

Kurti përmendi edhe se lëndën “Edukim në Siguri” e kanë bërë pjesë të kurrikulave shkollore për nxënësit e ciklit të mesëm të lartë.

“Së shpejti do të prezantojmë konceptin e Mbrojtjes Gjithëpërfshirëse që ia mundëson qytetarëve dhe organizatave të ndryshme të bëhen pjesë e sistemit të mbrojtjes e sigurisë dhe menaxhimit të emergjencave civile”, përfundoi ai.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.