“Kurti iu përkulke Mustafës për pak pushtet – e pak muaj më herët ia kishin sulmuar shtëpinë”

Shefi i Grupit Parlamentar të Aleancës për Ardhmërinë e Kosovës, Besnik Tahiri, i ka reaguar deputetit të Lëvizjes Vetëvendosje, Salih Zyba, meqë ky i fundit tha se lideri i AAK-së, Ramush Haradinaj do të ndërronte mendim për kryeministrin Albin Kurti, nëse ky i fundit do të ia ofronte postin e presidentit të Kosovës.

“Synimi i Ramush Haradinajt për postin e presidentit është synim legjitim dhe i logjikshëm dhe nuk është në pronësi të kurrkujt. Vetëvendosje është partia e fundit që mund të thirret në parime politike. Po ua rikujtoj që lideri i saj, Albin Kurti, iu përkulke Akademik Isa Mustafës për pak pushtet, madje duke e quajtur ‘Profesor Isë’, e pak muaj më herët po të njëjtit ia kishin sulmuar shtëpinë dhe familjen me kauza të rrejshme politike”, shkroi ai në Facebook.

Tutje, deputeti i AAK-së ka theksuar se LVV-ja çdo qëndrim politik “e ka shkelë me dy këmbë”, derisa ka theksuar e kjo Qeveri e ka sjellë vendin “buzë shkatërrimit politik e ekonomik”.

Reagimet e Zybës dhe Tahirit kanë ardhur pasi Haradinaj, në një intervistë për agjencinë kosovare të lajmeve “Ekonomia Online” të dielën, ka akuzuar kryeministrin kosovar, Albin Kurti, duke e konsideruar “njeri të rekrutuar nga armiku”. Gjithashtu, ai ka ngritur “dyshime” se lideri i Lëvizjes Vetëvendosje (LVV) edhe mund të jetë financuar nga Serbia.

Por, kjo nuk është hera e parë që Haradinaj e akuzon kreun e ekzekutivit kosovar për “tradhti” ndaj interesave kombëtare të Kosovës. Para një jave, kreu i AAK-së ka deklaruar se Kurti mund të ketë marrë “obligime” nga Serbia pas lirimit nga burgu më 2001.

Haradinaj vazhdimisht po i thotë Kurtit se “është njeri i Serbisë”, pse kryeministri s’po i reagon?

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.