Kurti: Importi i rrymës të mërkurën ka kushtuar mbi 2 milionë euro, ku ti marrim paratë?

Kryeministri i Kosovës, Albin Kurti, në seancën plenare të Kuvendit të Kosovës, ku po diskutohet propozimi i Zyrës së Rregullatorit të Kosovës për shtrenjtimin e rrymës, ka thënë se Kosova nuk ka kapacitetet e duhura prodhues dhe për këtë arsye duhet të importojë energji elektrike të cilën vetëm të mërkurën e ka paguar mbi 2 milionë euro.

“Të mërkurën kemi arritur të prodhojmë rrymë 727 megavat orë ndërkaq konsumi nacional ka qenë 1 mijë 317 megavat në orën 23:00 ndërsa ngarkesa bazë 834 megavat ndërsa ditën e djeshme importi është mbi 10 gigavatë orë ndërsa devijimi mbi 400 megavat orë”, ka thënë Kurti

“Vetëm dje kemi paguar importin e energjisë elektrike 2 milionë e 500 mijë euro, më tregoni deputet qysh të paguajmë, ku ta gjejmë këtë shumë, kjo është çështja, është shumë e thjeshtë”, ka vazhduar ai.

Kurti gjatë fjalimit të tij është përgjigjur edhe kritikave të Shefit të Grupit Parlamentar të PDK-së, Abelard Tahiri, i cili ka thënë se njerëzit në krye të Korporatës Energjike të Kosovës, janë të paaftë.

“Nuk ka rënë menaxhmenti, por turbina a e kuptoni. Lopatat e rrotorit të gjeneratorit në B2 janë copëtuar, për shkak të shtypjes së avullit, avulli i ka copëtuar lopatat e vjetruara që e kanë dëmtuar atë”, ia ka kthyer Kurti, Tahirit.

“Sa i përket filterave, ata kanë dashur të instalojnë filtera, por kur kanë shkuar aty e kanë parë që është ‘llom’, duhet një herë bojlerat e tani filterat, e ju s’i keni bo as filerat e as bojlerat, nuk ka filtera pa bojlera, e tash do t’i vendosim bojlerat që t’i vendosim edhe filterat”, ka theksuar ai.

I pari i ekzekutivit Albin Kurti, i është përgjigjur edhe deputetes nga radhët e Lidhjes Demokratike të Kosovës, Hykmete Bajramit, e cila e pyeti se a i ka ditur problemet në blloqet e KEK-ut në vitin 2019 kur premtonte ulje të çmimit të rrymës.

Në përgjigjen e tij Kurti i tha Bajramit: “Unë nuk kam thënë se do të ulën çmimet ditën kur do të bëhem kryeministër”.

“Çka nuk keni bërë ju mirë për 20 vjet e çka keni bërë keq për 20 vjet, nuk mundem me i bë unë për 10 muaj”, ka shtuar Kurti.

Më tej kryeqveritari ka theksuar se në kohën kur Bajrami ishte në qeverisje ishte refuzuar një projekt gjerman.

“Nga viti 2013 jemi angazhuar përvec se kemi pasur qëndrim kundër privatizimit të shpërndarjes dhe furnizimit. Por gjithashtu edhe për rivitalizimin e Kosovës A të termocentraleve të Kosovës A. Ka qenë një projekt shumë i mirë gjerman i cili është refuzuar edhe kur ju keni qenë në qeverisje dhe ja ku jemi sot këtu”, ka shtuar ai.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.