Kurti i kërkon QUINT-it që marrëveshja me Serbinë të zbatohet “pa kushte, pa vonesa dhe në mënyrë të plotë”

Kryeministri i Kosovës, Albin Kurti dhe zëvendëskryeministri Besnik Bislimi, të premten kanë diskutuar me ambasadorët e shteteve të QUINT-it dhe shefin e Zyrës së Bashkimti Evropian në Kosovë Tomas Szunyog, lidhur me procesin e dialogut.

Përmes një komunikate nga Zyra e Kryeministrit është thënë se temë diskutimi në këtë takim ka qenë zbatimi i marrëveshjes Bazë me Serbinë, aneksin e zbatimit nga takimi i 27 shkurtit në Bruksel dhe ai i 18 marsit në Ohër ndërmjet të dyja shteteve.

“Kryeministri Kurti dhe zëvendëskryeministri Bislimi theksuan se Marrëveshja Bazë dhe Aneksi i Zbatimit duhet të zbatohen pa kushte, pa vonesa dhe në mënyrë të plotë. Gjithashtu, u përmend nevoja që BE-ja ta mbajë përgjegjëse Serbinë për shkeljet e vazhdueshme që po i bën marrëveshjes”, është thënë në këtë takim thuhet në komunikatën e Zyrës së Kryeministrit.

Teksa është theksuar se procesi i dialogut do të vijojë me takimin e radhës të nivelit të kryenegociatorëve që pritet të zhvillohet të hënën e ardhshme, “e cila do të ketë në fokus zbatimin e sekuencuar të Marrëveshjes Bazë dhe Aneksit”.

Pas takimit me të dërguarin Special të Bashkimit Evropian për dialogun Kosovë-Serbi, Miroslav Lajçak kryeministri i Kosovës, Albin Kurti të premten ka mbajtur një takim edhe me ambasadorët e QUINT-it.

Takimi me ambasadorët ka zgjatur për rreth një orë, teksa nuk ka pasur deklarim për mediat pas përfundimit të këtij takimi.

Nga mediat e pranishme në oborrin e Qeverisë, ata janë parë duke dalur nga Qeveria, teksa kanë tentuar që të kenë një deklaratë në lidhje me takimin, ambasadorët nuk kanë pranuar që të prononcohen.

Një takim me ambasadorët e QUINT-it kryeministri i Kosovës, Albin Kurti e kishte zhvilluar edhe më 20 mars.

Ai kishte deklaruar se në takim me ambasadorët e QUINT-it kanë diskutuar lidhur me ecurinë e bisedimeve të shtunën në Ohër dhe për rezultatin e arritur aty me rastin e dakordimit publik për aneksin e zbatimit të marrëveshjes bazë.

Përmes një komunikate për media nga Zyra e Kryeministrit është thënë se palët janë angazhuar plotësisht për t’i respektuar të gjitha nenet e marrëveshjes.

Më 6 mars, edhe presidentja e Kosovës, Vjosa Osmani kishte pritur në takim ambasadorët e vendeve të Quint-it dhe Shefin e Zyrës së BE-së, me të cilët kishte biseduar për dialogun me Serbinë dhe për aneksin e zbatimit të marrëveshjes bazë të 27 shkurtit e cila ka për qëllim normalizimin e marrëdhënieve mes Kosovës dhe Serbisë.

Kosova dhe Serbia më herët gjatë këtij viti kanë arritur Marrëveshjen e Ohrit, që veç tjerash parasheh zbatimin e të gjitha marrëveshjeve të arritura në dialog, që kur procesi ka nisur më 2011.

Në të përfshihen edhe dy marrëveshjet për Asociacionin.

Kurse më 2013 dhe 2015, palët kishin arritur marrëveshje për Asociacionin, por, më 2015, Gjykata Kushtetuese e Kosovës gjeti se Marrëveshja mbi parimet për themelimin e Asociacionit nuk ishte në harmoni të plotë me aktin më të lartë juridik të shtetit, duke shtuar se marrëveshja mund të harmonizohet me ligjet në fuqi.

Dialogu mes Kosovës dhe Serbisë synon normalizimin e plotë të raporteve.

Kërkesa e Kosovës është që procesi të përmbyllet me një marrëveshje që do të përfshinte njohjen e ndërsjellë, ndërkaq Serbia është shprehur se dëshiron një zgjidhje kompromisi – pa treguar se për çfarë kompromisi bëhet fjalë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.