Kurti falënderon Latifin, i kërkon bashkëpunim “në forma të tjera”

Ashtu siç u tha gazetarëve, kryeministri i Kosovës, Albin Kurti, është takuar me Rifat Latifin, tashmë ish-ministër i Shëndetësisë së Kosovës.

Në njoftimin e dërguar nga Ministria e Shëndetësisë, thuhet se Kurti i ka shprehur mirënjohje Latifit për punën, angazhimin dhe kontributin e tij.

“Ai falënderoi Dr. Rifatin që nuk ka kursyer jo vetëm dijen e përvojën e tij, por edhe kontaktet e shumta ndërkombëtare, për ta ndihmuar e avancuar sektorin dhe sistemin e shëndetësisë në Kosovë”, thuhet në njoftim.

“Kryeministri i dëshiroi suksese në vijim, dhe shprehu vullnetin për mënyra të tjera për bashkëpunim në të ardhmen”.

Edhe Latifi e ka falënderuar kryeministrin për mundësinë dhe i ka premtuar se do të angazhohet si “profesionist, akademik e qytetar”.

Derisa të gjendet ministri i ri, Kurti ka emëruar zëvendësministren Dafina Gexha-Bunjaku, për ushtruese të detyrës së Ministres në Ministrinë e Shëndetësisë.

Ministri i Shëndetësisë, Rifat Latifi pas 11 muajve nga emërimi dha dorëheqje nga kabineti qeveritar.

Largimi i Latifit erdhi pas kritikave të shumta ndaj tij në menaxhimin e shëndetësisë.

Latifi është ministri i dytë i larguar nga kjo pozitë gjatë kësaj qeverisje.

Para tij ishte Arben Vitia i cili kishte dhënë dorëheqje për t’u fokusuar në garën për kryetar të Komunës së Prishtinës.

Në letrën e publikuar të dorëheqjes nga Latifi, është thënë se për këtë vendim ai kishte menduar tash e disa muaj.

“Me zhgënjim të thellë dhe keqardhje pas shumë reflektimesh për disa muajt e fundit, po ju informoj se në mënyrë efektive ju ofroj dorëheqjen time nga posti i ministrit të Shëndetësisë së Republikës së Kosovës, që nga sot me datën 6 tetor 2022”, është shkruar në letrën e publikuar të dorëheqjes nga Latifi.

“Bashkangjitur me këtë letër, gjeni një përmbledhje të shkurtër të të gjeturave, sfidave të ballafaquara si dhe të arriturat në këta 10 muaj të mi si ministër”, ka përfunduar ai.

Institucionet e Kosovës, akoma nuk kanë publikuar një deklaratë zyrtare për largimin e ministrit nga kjo pozitë.

Lidhur me këtë çështje as ministri Latifi, akoma nuk është deklaruar.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.