Lajme

Kurti: Faleminderit djemve tanë për emocionet – Zvicrës ia urojmë kualifikimin në Euro 2024


Kryeministri i Kosovës, Albin Kurti, pas barazimit të Kosovës me Zvicrën të shtunën ka thënë se përvoja e fituar nga lojtarët gjatë këtij cikli eliminator duhet të vihet në funksion në eliminatoret për Botërorin 2026.

“Faleminderit djemve tanë për emocionet në çdo ndeshje. Përvojën e fituar gjatë këtyre kualifikimeve, ta vëmë në funksion të përgatitjeve për fushatën e kampionatit botëror 2026. Zvicrës ia urojmë kualifikimin në Euro 2024”, ka shkruar Kurti në Facebook.

“Pa lojtarët kryesorë, kundër një ekipi që është në mesin e Top 15 kombëtareve të futbollit në botë, si mysafire, Kosova mbrëmë përsëri gjeti mënyrën për të na gëzuar”, shtoi ai.

Kosova ka arritur që të marrë një pikë në udhëtim ndaj Zvicrës, pas barazimit 1:1 në Basel.

Ky barazim i mundëson Zvicrës që të kualifikohet në kampionatin evropian “Euro2024”, ndërsa Kosova tanimë ka humbur të gjitha gjasat.

Në këtë ndeshje, Kosova është paraqitur pa Amir Rrahmanin, Vedat Muriqin, Milot Rashicën, Arijanet Muriqin e Edon Zhegrovën.

Nga Grupi I, ku bënë pjesë Kosova, tashmë zyrtarisht Rumania dhe Zvicra kanë siguruar biletën e kualifikimit për në Euro 2024.

 

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore