Lajme

Kurti e Golob zhvillojnë takimin e parë bilateral, flasin për potencialin ekonomik e dialogun Kosovë-Serbi


Albin Kurti dhe Robert Golob

Kryeministri i Kosovës, Albin Kurti, të hënën është takuar me homologun e tij slloven, Robert Golob, njëherit nikoqir i Forumit Strategjik të Bledit, me të cilin ka diskutuar mbi përmbytjet që Sllovenia i ka pësuar sivjet, potencialin ekonomik të Kosovës dhe dialogun Kosovë-Serbi të ndërmjetësuar nga Bashkimi Evropian (BE).

Gjithashtu, sipas njoftimi të Zyrës së Kryeministrit, kreu i ekzekutvit e ka falënderuar shtetin slloven për angazhimin drejt zgjidhjes së drejtë të çështjes së mëvetësimit në shtete të pavarura të popujve që e luftuan imperializmin serb të manifestuar që nga vitet 1990, ndërsa kryeministrin Golon për ndihmën e Kosovës ndër vite.

“Sllovenia ka strehuar disidentët tanë të parë, na ka ndihmuar në betejën tonë çlirimtare dhe tani është ndër pesë investitorët kryesorë në ekonominë tonë theksoi kryeministri dhe e falënderoi kryeministrin Golob për ndihmën dhe mbështetjen e Sllovenisë për Kosovën ndër vite”, thuhet në njoftimin e lëshuar të hënën.

Duke folur për potencialin e bashkëpunimit ekonomik, kryeministri Kurti vuri theksin te mundësitë që Kosova ofron për investitorët slloven, derisa në këtë drejtim ka veçuar sektorin e Teknologjisë e Informacionit dhe Komunikimit (ICT-TIK).

“Pozita e përshtatshme gjeografike, politikat e favorshme fiskale, stabiliteti institucional dhe potenciali i fuqisë punëtore e bëjnë Kosovën vend atraktiv për investimet sllovene, tha kryeministri gjersa veçoi sektorët në rritje sikurse ai ICT-TIK, përpunimit të drurit dhe metalit dhe prodhimit të ushqimit”.

Në kuadër të temës “Solidaritet për Sigurinë Globale”, kryeministri kosovar dhe ai slloven kanë diskutuar edhe për bashkëpunimin rajonal, anetaresimin e Ballkanit Perëndimor në familjen evropiane dhe sigurisht për dialogun ndërmjet Kosovës e Serbisë që pritet të rifillojë në shtator.

Kurti pas takimit me Lajçakun shpreh nevojën për njohje reciproke mes Kosovës dhe Serbisë

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore