Lajme

Kurti: Do të vazhdojmë të punojmë për të promovuar dhe mbrojtur të drejtat e të gjithëve, pa përjashtim


Kryeministri i Kosovës, Albin Kurti, me rastin e 75-vjetorit të Deklaratës Universale të të Drejtave të Njeriut, ka thënë se Kosova do të vazhdojë të punojë për të promovuar dhe mbrojtur të drejtat e të gjithëve, pa përjashtim dhe pa diskriminim

“Në 75-vjetorin e Deklaratës Universale të të Drejtave të Njeriut, Republika e Kosovës rikonfirmon përkushtimin e saj ndaj Deklaratës, të parashikuar shprehimisht në Kushtetutën tonë. Ne vazhdojmë të punojmë pa u lodhur – sot dhe çdo ditë – për të promovuar dhe mbrojtur të drejtat e të gjithëve, pa përjashtim dhe pa diskriminim. Dita e të Drejtave të Njeriut 2023”, ka shkruar ai në platformën X.

Më 10 dhjetor 1948, menjëherë pas fitores së aleatëve ndaj nazistëve, Asambleja e Përgjithshme e Kombeve të Bashkuara në Paris, në Palais de Chaillot, miratoi Deklaratën Universale të të Drejtave të Njeriut (DUDNJ).

Dy vjet më vonë, në vitin 1950, u vendos që 10 dhjetori të shënohet si Dita Botërore dedikuar deklaratës.

Pasi dolën nga tragjedia e Luftës së Dytë Botërore, kombet shprehën dëshirën dhe ambicien për të rindërtuar një shoqëri më të drejtë. Nuk bëhej fjalë për të harruar tragjedinë dhe tmerrin që ajo luftë kishte shkaktuar në Evropë dhe në mbarë botën, por u shpreh nevoja për herë të parë për liri, barazi dhe universalitet ndaj drejtësisë.

Kombet dilnin nga një luftë tragjike, pas përvojës së kampeve të përqendrimit dhe shfarosjes, urrejtjes racore, Holokaustit, bombave atomike të Hiroshimës dhe Nagasakit, pas 50 milionë vdekjesh, pas një kolapsi ekonomik, varfërisë ekstreme të popullsive.

Preambula e Deklaratës saktëson në fakt se “mohimi dhe përbuzja e të drejtave të njeriut kanë çuar në akte barbarie që ofendojnë ndërgjegjen e njerëzimit”, prandaj e konsideron thelbësore që “të drejtat e njeriut të mbrohen me norma ligjore, nëse duam të shmangim që njeriu të detyrohet të përdorë, si mjet të fundit, rebelimin kundër tiranisë dhe shtypjes”.

75 vjet Deklaratë Universale, por jo globale

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore