Kurti, Borell – “Unë jam demokrat” – “Demokrat jam edhe unë” – Përplasje rreth Asociacionit

Kryeministri i Kosovës, Albin Kurti, dhe Përfaqësuesi i Lartë për Politikë të Jashtme i BE-së, Joseph Borell, pas mbledhjes së katërt të Këshillit të Stabilizim-Asociimit, shprehën haptazi kundërshtimet mes vete në lidhje me themelimin e Asociacionit të Komunave me shumicë serbe.

Borell, ishte i prerë në atë se “Asociacioni i Komunave Serbe duhet të implementohet, sepse do të jetë pjesë integrale e marrëveshjes së ardhme gjithëpërfshirëse të normalizimit të marrëdhënieve mes Kosovës dhe Serbisë”.

“Çfarë kam për të thënë kur është puna te Asociacioni i Komunave me shumicë serbe, është ajo çfarë kam thënë në disa raste gjatë këtij takime dhe para këtij. Themelimi i Asociacionit është pjesë e marrëveshjes së Brukselit”.

Ndërsa Kryeministri Kurti tha se “jemi për arritjen e njohjes reciproke për normalizimin e plotë të marrëdhënieve ndërmjet shteteve tona, në këtë proces roli i BE-së si partnere është e domosdoshme”.

Kurti, teksa ka përmendur 33 marrëveshjet ndërmjet Kosovës dhe Serbisë, ai tha se “dy të tretat e tyre nuk janë zbatuar nga Serbia, por Beogradit zyrtar gjithmonë pëlqen të përmend një marrëveshje”.

“Më kujtohet, më 23 dhjetor 2015, kur u bë publik vendimi i Gjykatës Kushtetuese për Asociacionin asnjë serb i Kosovës nuk protestoi, por vetëm Beogradi”.

Ai theksoi se “është koha për të zhvilluar një dialog ku njerëzit, qytetarët janë përfituesit përfundimtarë dhe jo politikanët”.

“Pra, ne kemi nevojë për një karakter demokratik të dialogut, që do të thotë se njerëzit të përfitojnë prej tij”.

“Unë jam demokrat dhe prandaj besoj se kapitulli i ardhshëm i dialogut ndërmjet Kosovës dhe Serbisë nuk duhet të jetë për të kënaqur një politikan, për të shpëtuar lëkurën e atij politikani, por për të ndihmuar dhe për t’u shërbyer njerëzve”, shtoi Kurti.

Ndërkaq, deklarimit të Kurti se “unë jam demokrat”, simetrikisht iu përgjigj edhe Borell.

“Demokrat jam edhe unë”.

“Dhe këtu nuk jam t’i shërbej ndonjë politikani, të asnjërës palë. Por ajo që është dëshmuar deri më tani është dialogu është rruga e vetme për t’i adresuar dhe zgjidhur çështjet e hapura. Dëshirojë që ta keni parasysh në mënyrë të plotë rëndësinë e dialogut dhe që të tejkaloni vështirësitë e Kosovës”, iu kundërpërgjigj Borell.

Ndërsa sa i përket vendimit të Gjykatës Kushtetuese se Asociacioni është rrëzuar nga ajo, Borell tha se “nuk pajtohem me këtë”.

“Ajo është arritur nga përfaqësuesit e dy vendeve, në besim të ndërsjellë dhe në pajtim me principte ndërkombëtare për arritje të marrëveshjeve dhe brenda konturës së dialogut”.

“E kuptoj se ka edhe marrëveshje tjera të cilat nuk janë zbatuar. Nga të dyja palët ka marrëveshje që s’janë zbatuar. Por kjo është shumë e rëndësishme”.

Kosova dhe Bashkimi Evropian

Kryeministri Kurti u shpreh se fati i Kosovës është në BE dhe se Kosova nuk ka alternativë tjetër përveç unionit.

Kryeqeveritari Kurti, ka bërë të ditur se Kosova ka plotësuar të gjitha kriteret e BE-së për liberalizim të vizave madje disa herë më shumë se sa që duhej të plotësonin vendet e rajonit.

“Kushtet e BE-së për pranimin e Kosovës duhet të jenë të drejta, që pranimi i Kosovës në BE të jetë më realist, duhet të kemi liberalizimin e vizave për kosovarët”, ka thënë Kurti.

 

Borrell: Kosova të jetë më konstruktivë në dialog të implementojë të gjitha marrëveshjet e arritura 

Në anën tjetër Borrell, gjatë konferencës së përbashkët ka deklaruar se marrëveshja e Stabilizimit-Asociimit është qendra apo themeli i bashkëpunimit, drejt shtegut evropian.

“Marrëveshja e Stabilizim Asociimit mbetet bërthama e marrëdhënieve mes Bashkimit Evropian dhe Kosovës. Është udhërrëfimi juaj në rrugën evropiane dhe krijon mundësi tregtare dhe investime. Por sigurisht se ne s’mund ta bëjmë punën për ju”.

Borrell, ka folur edhe për dialogun në mes të Kosovës dhe Serbi duke potencuar se Kosova duhet të qaset konstruktivisht dialogut.

“Që nënkupton respektimin dhe implementimin e plotë të të gjitha marrëveshjeve të arritura, pa ndonjë lloj angazhimi selektiv. Këtu edhe Serbia edhe Kosova kanë shumë punë për të bërë. Sepse status quo-ja nuk është as e favorshme as e qëndrueshme për asnjërën prej tyre”.

“Është e rëndësishme të tejkalohen bagazhi i së kaluarës, të hiqen barrierat, dhe të ndihmohet i tërë rajoni që të përafrohet me Evropën”

Ai, ka shprehur skepticizëm se një takim i ardhshëm në dialog në mes të Kurtit, dhe Presidentit të Serbisë, Aleksandar Vuçiç, do të mbahet në dhjetor.

“Ne gjithmonë organizojmë takime dhe mblidhemi kur është e përshtatshme. E kemi bërë të qartë që pas dy takimeve sivjet, parakusht është gatishmëria e të dyja palëve të pajtohen për rezultate konkrete. Do të ishte e pakuptimtë të mbajmë takim nëse kushte s’përmbushen e të takohemi prapë për asgjë”, ka shtuar ai.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com