Lajme

Kurti bisedon me Sheikh Abdullah bin Zayed, Emiratet do ndërtojnë një spital për fëmijë me vlerë 25 milionë dollarë


Kryeministri i Kosovës, Albin Kurti, ka njoftuar se Emiratet e Bashkuara Arabe do të dhurojnë 25 milionë dollarë për ndërtimin e një spitali për fëmijë në Kosovë.

Siç njofton zyra e kryeministrit, Kurti këtë të premte ka zhvilluar një bisedë telefonike me Ministrin e Punëve të Jashtme të Emirateve të Bashkuara Arabe, Sheikh Abdullah bin Zayed Al Nahyan.

“Ministri Zayed Al Nahyan e informoi se Emiratet e Bashkuara Arabe do të dhurojnë 25 milionë dollarë për një spital të ri të fëmijëve në Kosovë”, thuhet në njoftimin e zyrës së kryeministrit.

Ndërkaq, nga ana tjetër kreu i ekzekutivit kosovar ka shprehur mirënjohjen e tij për këtë kontribut, “që do të ndikojë drejtpërdrejt në jetën e shumë fëmijëve në Republikën e Kosovës”.

Bëhet me dije se përveç kësaj, subjekt i bisedës në mes të Kurtit dhe kryediplomatit të Emirateve të Bashkuara Arabe ka qenë edhe “avancimi dhe forcimi i mëtejmë i marrëdhënieve mes shtetit të Kosovës dhe Emirateve të Bashkuara Arabe”.

Ndryshe, edhe në shtator të vitit 2021, Emiratet e Bashkuara Arabe kishin inauguruar një spital për fëmijë që ishte financuar nga ta.

Aty kishte qenë edhe Presidentja e Kosovës, Vjosa Osmani, ku kishte falënderuar Emiratet e Bashkuara Arabe që mundësuan ndërtimin e këtij spitali në vlerë prej 22 milionë euro dhe me kapacitet prej 100 shtretër.

Osmani duke theksuar se tashmë fëmijët e Kosovës do të kenë një adresë të trajtimit me infrastrukturë moderne, ka shtuar se ky spital simbolizon edhe “miqësinë e Kosovës me Emiratet e Bashkuara Arabe”.

“Ky spital është një nga ndërtesat më moderne, me një kapacitet prej 100 shtretërve, ku Kosova do të mund të ofrojë mjekim intensiv, shërbime laboratorike e diagnostike, salla operative e shumë shërbime të tjera. Më në fund adresa për shërim të fëmijëve tanë nuk do të jenë vendet e rajonit apo ato më të largëta, adresa për trajtimin e shërimit të fëmijëve tanë do të jetë shtëpia jonë”, ishte shprehur Osmani.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore