Kurti: Asociacioni jo si parakusht për dialogun, por si pjesë e tij

Kryeministri i Kosovës, Albin Kurti, në intervistën e tij të fundit për gazetën prestigjioze gjermane, Frankfurter Allgemeine Zeitung, ka deklaruar se është i gatshëm të diskutojë për Asociacionin e Komunave me Shumicë Serbe, por jo si parakusht për bisedime, por si pjesë e diskutimit për normalizimin e marrëdhënieve ndërmjet Kosovës dhe Serbisë duke u bazuar në propozimin i cili së fundmi dinamizoi dialogun – propozimi franko-gjerman.

Sipas shefit të ekzekutivit deri më tani në kuadër të dialogut janë nënshkruar 33 marrëveshje, por Serbia është e interesuar vetëm për njërën nga këto – Asociacionin.

“Unë e pranoj që këto 33 marrëveshje ekzistojnë dhe jam i gatshëm t’i marrë përsipër të gjitha ato në bisedimet zyrtare për normalizim të marrëdhënieve mbi bazën e propozimit franko-gjerman në Bruksel. Por, Serbia do të dëshironte ta shkëpuste këtë marrëveshje dhe të shpërfillë 32 tjera, si dhe propozimin franko-gjerman. Unë nuk do të marrë pjesë në këtë”, ka thënë Kurti.

Sipas Kurtit, asnjë serb në Kosovë nuk i ka kërkuar atij deri më tani formimin e Asociacionit.

Asociacioni sipas tij është kërkesë ekskluzive e Serbisë, në këtë rast presidentit, Aleksandër Vuçiç.

“Të drejtat e minoriteteve janë të rëndësishme në luftimin e dominimit të nacionalizmit. Por, Beogradi nuk qëndron për të drejtat e serbëve. Serbia dëshiron t’i territorializojë këto të drejta, dhe kjo është krejtësisht një gjë tjetër. Beogradi dëshiron që këto komunitete serbe të formojnë një bashkësi. Pranoj dhjetëra letra nga qytetarët serbë të vendit tonë çdo javë. Janë për gjëra të ndryshme, për punë, për funksionim të sundimit të ligjit e të tjera. Askush s’më shkruan: ‘Na duhet asociacion’. Vetëm zoti Vuçiç e thotë këtë”.

Kurti më tej është shprehur i habitur se si Serbia edhe nuk e pranon Kosovën si shtet, e në anën tjetër kërkon nga ajo formimin e Asociacionit.

“Sllogani serb është ‘ju nuk ekzistoni – por duam diçka nga ju’. Kështu nuk funksionon. Së dyti, kur kërkoni një gjë, gjithmonë duhet ta keni ndërmend se e njëjta gjë mund t’ju kërkohet edhe juve. Pakicat përbëjnë rreth tetë për qind të popullatës në Kosovës dhe 20 përqind të popullatës në Serbi. Serbia duhet të mendoj për parimin. Përveç kësaj, Gjykata jonë Kushtetuese e ka rrëzuar Asociacionin e Komunave me shumicë serbe në mospërputhje me Kushtetutën e Kosovës”.

Për qëndrimin e Kurtit në raport me Asociacionin, Albanian Post, kishte raportuar më 9 nëntor.

Në artikullin ku AP kishte raportuar për propozimin tre-pikësh të ndërkombëtarëve për dalje nga situata në Veri, kishte shkruar se Qeveria e Kosovës e do Asociacionin e Komunave me Shumicë Serbe brenda Marrëveshjes së Përgjithshme, e cila brenda qarkut tashmë njihet si Marrëveshja Bazë, ndërsa Serbia nuk e do Asociacionin brenda marrëveshjes.

Por, Serbia e bën këtë refuzim pikërisht, sepse do zbatim të Asociacionit jashtë marrëveshjes, e vetëm pastaj të diskutohet mbi propozimin, duke kërkuar një koncesion tjetër.

Kosova e ka pranuar Asociacionin, por brenda marrëveshjes, në mënyrë që të nënkuptohet si lëshimi që po e bën Kosova në propozimin franko-gjerman.

Ekskluzive në Albanian Post: Propozimi tre-pikësh i ndërkombëtarëve për dalje nga situata aktuale në Veri – kështu vazhdohet tutje

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.