Kosova

Kur rusët erdhën 25 vjet më parë në Aeroportin e Prishtinës – Çeku: Kanë pasur municione biologjike dhe kimike


Agim Çeku, ish-komandant i Ushtrisë Çlirimtare të Kosovës

Rusia, tinëzisht, dhe në hije nga komuniteti ndërkombëtar, arriti që e para të futej në Kosovë me qindra trupa 25 vjet më parë në Prishtinë, derisa sipas ish-komandantit të Ushtrisë Çlirimtare të Kosovës, Agim Çeku, në mesin tyre kishte edhe ushtarë serbë nga Bosnja dhe Hercegovina.

“Ata kanë ardhur që të dëshmojnë që nuk janë nënshtruar para NATO-s, që janë të pavarur nga vendimet e NATO-s dhe e kanë politikën e vet. E nisën një konvoj nga Bosnja dhe Hercegovina, qëllimi tjetër ka qenë që t’i japin mesazh popullit të Serbisë që nuk ju kemi tradhtuar, ne jemi prapë me ju. Në mesin e tyre kanë qenë 270 serbë nga BeH”, pati treguar Çeku për Albanian Post dy vite më parë.

Përveç kësaj, sipas Çekut, kishte edhe një arsyeje tjetër që ushtarët rusë ishin vendosur në Aeroportin e Prishtinës.

“Në tunelin e Aeroportit ka pasur ende avion serbë dhe municion që nuk është përdorur në atë kohë. Ka pasur municione kimike dhe bilogjike, kanë qenë të fshehura aty, ka pasur edhe raketa tok-ajër”, kishte treguar ai.

Ndryshe këtë të mërkurë, bëhen 25 vjet nga çlirimi i Kosovës – atëherë kur tanket britanike “Challenger” në rrugë tokësore dhe “Apache-t” amerikanë përmbi qiell, në kuadër të trupave paqeruajtëse të NATO-s, filluan marshimin në Kosovë.

Në këtë 25-vjetor, janë paraparë disa ceremoni, ndër të cilat edhe parakalimi i Forcës së Sigurisë dhe Policisë së Kosovës në sheshin qendror të Prishtinës.

Nga ora 09:15, presidentja e Kosovës, Vjosa Osmani, do ta presë në takim presidentin e Shqipërisë, Bajram Begaj, ndërsa Kuvendi i Kosovës, në orën 10:00, do të nisë seancë solemne për 25-vjetorin e Ditës së Çlirimit.

Rrëfimi i plotë i Çekut dy vite më parë për Albanian Post:

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore