Kupa e Shqipërisë, Longo i Kukësit: Egnatia është ekip i vështirë

Diego Longo, trajneri i Kukësit, ka folur për mediat në prag të sfidës me Egnatian në Kupën e Shqipërisë, që do të luhet të mërkurën në Peqin.

Tetë sfida do të luhen këtë të mërkurë në Kupën e Shqipërisë: Egnatia – Kukësi, Tomori – Laçi, Pogradeci – Vllaznia, Flamurtari – Kastrioti, Bylis – Skënderbeu, Korabi – Teuta, Besëlidhja – Partizani dhe Dinamo – Tirana.

Përballjet më të forta të këtij raundi në Kupë, shihet ato mes Kukësit dhe Egnatias, si dhe Dinamos me Tiranën. Kjo pasi skuadrat vijnë nga elita e futbollit shqiptar.

Për trajnerin Longo, kundërshtari është ekip i vështirë, por Kukësi ka objektiva të qarta dhe Kupa është një trofe që duan ta fitojnë.

“Egnatia është një ekip i vështirë dhe këtë e kam thënë që në fillim. Tani është ndryshe nga fillimi, pasi kanë ardhur në formë dhe do të na e bëjë më të vështirë edhe fusha, pasi do të luhet në Peqin”, tha tekniku italian.

“Çdo kompeticion dhe gjithashtu çdo seancë stërvitore është shumë e rëndësishme për ne. Kupa është një trofe dhe ne do të provojmë ta çojmë në Kukës”.

Tekniku vijoi më tej duke thënë se “Jam i lumtur për mënyrën sesi kemi luajtur dhe jemi stërvitur deri tani. Sigurisht që rezultatet janë shumë të rëndësishme”.

“Kemi humbur tre pikë naive si dy ndaj Laçit dhe një ndaj Teutës, megjithatë puna ime është të analizoj paraqitjen e skuadrës”, përfundoi Longo.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.