Shqipëria

Kufijtë tregtarë i kapërcen ideja


Edhe bizneset e kanë një “pasaportë” për të eksploruar terrenin tregtar jashtë kufijve.

Kanë marketingun ndërkombëtar. Me metodat e veta, ai kaherë bën lëvizjen e duhur për t’u akomoduar me të panjohurat.

Dhe këtë e arrin nëpërmjet një ideje që bën dallim nga çka rrotull.

Në vend ka biznese, të cilat e aplikojnë këtë formë të marketingut. Por sa e njohin ata terrenin dhe me çfarë idesh?

Njohja e para, të tjerat pas

Për specialisten e marketingut digjital, Aunela Stoli, marketingu ndërkombëtar nuk gëzon njohje nga “pjesa më e madhe” e bizneseve vendase.

Qofshin ato të vogla, apo të mesme.

Përvoja e saj disavjeçare në treg e ka përballur me faktin se kjo qasje e marketingut, kryesisht vihet në zbatim në mënyrë të tërthortë.

Dhe arsyeja për këtë është shpeshherë audienca që bizneset shqiptare synojnë përmes “ofrimit të konsultave online apo e-shop për dërgesa jashtë kufijve”.

Prandaj, për marketeren, fillimisht ka rëndësi njohja e audiencës.

“Përpara se të diskutohen mënyrat, duhet të kihet parasysh audienca që bizneset dëshirojnë të shënjestrojnë”, tregon ajo për Albanian Post.

Kjo, sepse studimi i audiencës është një nga “pikat kyçe”.

Njohja e audiencës sjell me vete pyetje që kërkojnë përgjigje të prera.

Të tilla si: “Tek audienca ndërkombëtare përfshihen shqiptarët jashtë Shqipërisë apo edhe të huajt? Çfarë interesash ka klienti ideal?”.

Specialistja Stoli shpjegon se mënyrat e marketingut digjital që vijnë pas, variojnë nga biznesi në biznes.

“Në fillim duhet bërë një analizë e mirëfilltë mbi audiencën dhe tregun që biznesi kërkon të arrijë”, përsërit ajo.

Sipas Stolit, ka dy metoda që mund të ndiqen.

“Metoda e parë është bashkëpunimi me një influencues, i cili ka një audiencë që i përshtatet biznesit. Kurse metoda e dytë është përmes reklamimit me pagesë”, tregon ajo.

Për marketerin Arton Smajli, marketingu ndërkombëtar nuk praktikohet në masë të gjerë nga bizneset shqiptare.

Madje, edhe kur kjo ndodh, nuk veprohet siç duhet.

Marketingu ndërkombëtar ka shumë forma, sipas tij.

“Njëra prej tyre është nëpërmjet organizimit të eventeve të ndryshme për prezantimin e produkteve të reja, apo edhe ekzistuese. Për t’i vënë në kontakt me vizitorët”, tregon ai.

Çka ushtrohet në disa mënyra në Shqipëri dhe Kosovë, por që nuk është mjaft e “shëndetshme”, sepse nuk ka hapësirë për përmirësim të dukshëm.

“Zhvillohen panaire, por ato dallojnë nga eventet. Panairi është më i kufizuar, nuk mund të shërbejë për marketing ndërkombëtar”, sqaron ai për Albanian Post.

Prandaj, krijimi i eventeve nga njerëz kompetentë, të cilët kanë aftësi organizative të mira, përbën zgjedhje efikase.

“Personalisht do të parapëlqeja t’i shihja produktet në një event dhe të flisja vetë me marketerin për to, më shumë sesa t’i shihja në televizor”, thotë Smajli.

Sepse nuk ka kohë të përcaktuar dhe nuk është afërsia që e bën klientin të ndihet mirë para produktit.

“Çka e bën marketingun t’i kalojë kufijtë është ideja, strategjia dhe zhvillimi i planit, duke përdorur kohën e duhur, vendin e duhur dhe produktin e duhur”, dallon ai.

Mirëpo, nuk duhet anashkaluar as marketingu brenda, është një proces që konsiston në “tërheqjen e shërbimit potencial ndaj klientit”.

Për specialistin, është një nga mënyrat më efikase për të tërhequr klientët e rinj dhe për t’i bërë ata promotor të biznesit.

“Në strategjinë e marketingut për brenda vendit, mund të shndërrohet të gjithë konsumatorët potencialë në klientë dhe gradualisht të bëhen promotor të markës”, sugjeron Smajli.

Po ashtu duhen diskutuar me marketerët të gjitha “ngecjet”, në mënyrë që të përzgjidhet një strategji që funksionon në mënyrë të sigurt në momentin që shfaqet një problem.

Ai këshillon që bizneset të mos hezitojnë për të investuar.

Përkundrazi, të gjejnë marketerë të mirë drejt rrugës për të krijuar diçka që diferencon nga të tjerët.

“Duhet ecur çdo ditë me trendin”, thekson specialisti i marketingut.

Dhe të mos mungojë gatishmëria për të ndërmarrë riskun, pasi shpërblimi është shumëfish.

/Albanianpost.com


Lajmet kryesore